Ársskýrsla Hagstofu Íslands fyrir árið 2009 hefur nú verið gefin út. Er það önnur ársskýrslan sem Hagstofan sendir frá sér, en stofnunin varð sjálfstæð stofnun 2008 samkvæmt lögum nr. 163/2007.
Í ársskýrslunni er gerð grein fyrir helstu áherslumálum stofnunarinnar og þeim fjármunum sem varið var til hagskýrslugerðar árið 2009. Í skýrslunni kemur meðal annars fram að Hagstofan birtir tölfræði um framvindu efnahags- og félagsmála í samræmi við innlendar og alþjóðlegar skuldbindingar nær hvern virkan dag ársins. Um 70-80% af hagtölum er safnað að kröfu alþjóðastofnana, einkum Evrópusambandsins. Um starfsemi Hagstofunnar gilda rúmlega 250 bindandi gerðir Evrópusambandsins auk innlendrar lagasetningar.
Auk skýrslu yfirstjórnar og umfjöllunar um fjármál og rekstur er í ársskýrslunni fjallað um samstarf við notendur, afnot af gögnum, útgáfur Hagstofunnar, starfsmannamál, erlent samstarf og gerð grein fyrir skýrslu framkvæmdastjórnar ESB um stöðu hagskýrslugerðar á Íslandi.
Skýrslan er 28 síður og hana prýðir fjöldi ljósmynda og skýringarmynda.
Ársskýrsluna má skoða hér á vefnum.