Vinnumarkaðsrannsókn

Vinnumarkaðsrannsókn Hagstofu Íslands er ætlað að afla upplýsinga um störf fólks, vinnutíma og atvinnuleit þess í samræmi við vinnumarkaðsmælingar hagstofu Evrópusambandsins (Eurostat). Rannsóknin hefur verið framkvæmd frá árinu 1991. Á árunum 1991 – 2002 voru tvær rannsóknir á ári, í maí og nóvember en rannsóknin hefur verið samfelld allt árið frá og með árinu 2003.

Rannsóknin hefur verið framkvæmd frá árinu 1991. Á árunum 1991 – 2002 voru tvær rannsóknir á ári, í maí og nóvember en rannsóknin hefur verið samfelld allt árið frá og með árinu 2003. Í úrtökuramma hverrar vinnumarkaðsrannsóknar eru allir íslenskir og erlendir ríkisborgarar 16–89 ára sem skráðir eru í þjóðskrá og eiga lögheimili á Íslandi. Í ársbyrjun 2021 voru efri mörk aldurs í úrtaki rannsóknarinnar færð úr 74 árum í 89 ár. Eftir sem áður verða gefnar út tölur um 16-74 ára en að auki er stefnt á að gefa út tölur fyrir eldri aldurshópinn.

Gögnum er safnað samfellt allt árið um kring en árinu er skipt upp í fjögur 13 vikna tímabil og er úrtakið um 5.200 einstaklingar í hverjum ársfjórðungi. Úrtakinu er skipt í fimm hópa. Í hverjum ársfjórðungi er einn hópur úrtaksins í fyrsta sinn í viðtali, annar hópur í annað sinn og svo framvegis. Í hverjum ársfjórðungi er hópnum sem verið hefur í úrtakinu fimm sinnum skipt út fyrir nýjan hóp. Nýir þátttakendur eru valdir með einfaldri slembiúrtöku án skila. Einstakir þátttakendur eru þrjá ársfjórðunga í röð í rannsókninni, þá tekur við tveggja ársfjórðunga hvíld og loks eru þeir í rannsókninni tvo ársfjórðunga í röð. Enginn þáttakandi er spurður oftar en einu sinni í hverjum ársfjórðungi. Þegar þátttöku er lokið er einstaklingi ekki skilað í úrtökurammann fyrr en tveimur árum eftir að hann var síðast í úrtaki.

Þátttakendur hverju sinni eru spurðir um atvinnuþátttöku í tiltekinni viku, svokallaðri viðmiðunarviku. Viðmiðunarvika byrjar á mánudegi og er í flestum tilfellum síðasta heila vikan áður en viðtal fer fram.

Lýsigögn vinnumarkaðsrannsóknar