Árið 2025 voru að jafnaði 235.900 manns á aldrinum 16-74 ára á íslenskum vinnumarkaði, sem jafngildir 81,4% atvinnuþátttöku. Vinnuaflinu fjölgaði um eitt þúsund manns frá árinu 2024 en hlutfall vinnuafls af mannfjölda eða atvinnuþátttakan dróst saman um 0,8 prósentustig. Atvinnuþátttaka kvenna var 78,1% samanborið sem er nánast alveg sú sama og hún var árið 2024 og þátttaka karla var 84,4% árið 2025 samanborið við 86,2% árið áður.
Hlutfall starfandi 77,8%
Fjöldi starfandi fólks árið 2025 var að jafnaði 225.700 og voru því um 1.300 færri starfandi árið 2025 en árið 2024. Hlutfall starfandi af mannfjölda var 77,8% samanborið við 79,5% árið 2024. Áætlað er að af öllum starfandi hafi konur verið að jafnaði um 105.000 allt árið 2025, eða 74,8% kvenna og karlar voru um 120.700, eða 80,7%. Ekki var nægjanlegur fjöldi í úrtaki vinnumarkaðsrannsóknar til að greina frekar fjölda kynsegin/annað en samkvæmt talningu úr staðgreiðslugögnum voru 102 kynsegin/annað (skráð samkvæmt þjóðskrá) starfandi að jafnaði árið 2025.
Menntun og staða á vinnumarkaði: þróun síðustu tuttugu ára
Þróun undanfarinna tuttugu ára sýnir vel samspil menntunar og starfandi fólks á íslenskum vinnumarkið. Það er að hlutfall háskólamenntaðra af starfandi fólki á aldrinum 25-64 ára á íslenskum vinnumarkaði hefur aukist töluvert á þessu tímabili, eða úr 30,5% árið 2005 í 49,0% árið 2025. Á sama tíma hefur hlutfall þeirra sem aðeins hafa lokið grunnmenntun dregist mikið saman eða úr 30,4% árið 2005 í 17,2% árið 2025. Hlutur þeirra sem hafa lokið starfs- og/eða framhaldsmenntun hefur einnig dregist saman á þessu tímabili eða úr 39,0% í 33,6%.
Atvinnuleysi 4,3%
Að jafnaði voru 10.300 manns án vinnu og í atvinnuleit árið 2025 eða 4,3% vinnuaflsins. Til samanburðar voru að jafnaði 7.900 atvinnulausir árið 2024 eða 3,3% vinnuaflsins. Árið 2025 var atvinnuleysi nánast það sama hjá konum og körlum eða rétt rúm 4,3% hjá konum og tæplega 4,4% hjá körlum.
Þegar atvinnuleysi er skoðað eftir aldurshópum þá mælist atvinnuleysið árið 2025 mest hjá þeim sem eru á aldrinum 16 til 24 ára, eða 9,2%. Hjá aldurshópnum 25 til 54 ára mældist það 4,0% og 1,5% hjá þeim sem eru á aldrinum 55 til 74 ára. Til samanburðar þá mældist atvinnuleysið árið 2024 einnig mest hjá yngsta aldurshópnum eða 8,5%. Aldurshópurinn 25 til 54 ára mældist með 2,6% og 55 til 74 ára mældist með 1,8% atvinnuleysi.
Árið 2025 mældist atvinnuleysi meira á höfuðborgarsvæðinu en utan þess, eða 4,9% samanborið við 3,2%. Það sama var einnig upp á teningnum árið 2024 þegar atvinnuleysi á höfuðborgarsvæðinu var 3,7% og utan þess mældist það 2,8%.
Vinnustundir á viku 35,9
Heildarvinnustundir þeirra sem voru við vinnu voru að meðaltali 35,9 klukkustundir á viku árið 2025. Samanburður á milli ára sýnir að vinnustundir voru 24 mínútum styttri en þær voru að jafnaði árið 2024, en þá voru þær 36,3. Heildarvinnustundir kvenna árið 2025 voru að jafnaði 32,6 klukkustundir á viku og karlar 38,6 klukkustundir, samanborið við árið 2024 þegar konur unnu 32,8 og karlar 39,2 klukkustundir.
Fólk sem býr utan höfuðborgarsvæðisins vinnur að jafnaði fleiri vinnustundir á viku en þeir sem búa á höfuðborgarsvæðinu. Meðalfjöldi vinnustunda fólks á höfuðborgarsvæðinu árið 2025 var 34,5 en íbúar utan höfuðborgarsvæðisins unnu að jafnaði 38,4 klukkustundir. Munurinn á milli búsetusvæðanna var nánast sá sami 2024 og árið 2025.
Fólk vann að jafnaði 37,7 klukkustundir í venjulegri vinnuviku árið 2025 ,sem er um einni klukkustund og 48 mínútum meira en unnar stundir á viku. Frá árinu 2021 hefur munurinn verið sambærilegur og nú eða rétt um eða yfir einni og hálfri klukkustund þar sem mat fólks á venjulegum stundum var hærra fyrir tiltekna viku en unnar stundir fólks. Mælingar vinnumarkaðsrannsóknar sem gerðar voru fyrir árið 2021 sýna að þá var þessu öfugt farið. Mögulegar skýringar á þessu breytta mynstri eru að árið 2021 var spurningum um unnar stundir breytt, það er að nú eru fleiri spurningar en áður sem beinast tilhögun vinnutíma fólks. Einnig er ekki hægt að útiloka að reynsla fólks af styttri vinnuviku hafi ekki fullkomlega síast inn eftir að hún var innleidd hjá stórum hluta vinnuaflsins.
Svarhlutfall
Heildarúrtak hvers árs í vinnumarkaðsrannsókn er dregið ársfjórðungslega úr þjóðskrá allt árið um kring og raðað niður á allar vikur hvers fjórðungs. Hvert úrtak telur rétt um fimm þúsund einstaklinga 16 til 74 ára og samanlagður fjöldi yfir árið 2025 var 20.683. Heildarfjöldi svara fyrir árið var 9.682 sem samsvarar 46,8% þátttöku. Svarhlutfall kvenna var 47,8% og karla var 45,9%.