Samkvæmt vinnumarkaðsrannsókn Hagstofu Íslands er áætlað að 209.300 manns á aldrinum 16–74 ára hafi að jafnaði verið á vinnumarkaði í maí 2018, sem jafngildir 83,4% atvinnuþátttöku. Af þeim voru 201.100 starfandi og 8.200 án vinnu og í atvinnuleit. Hlutfall starfandi af mannfjölda var 80,1% en hlutfall atvinnulausra af vinnuafli var 3,9%.

Samanburður mælinga fyrir maí 2017 og 2018 sýnir að vinnuaflið jókst um 6.000 manns en hlutfall þess af mannfjölda lækkaði um 1,3 prósentustig. Fjöldi starfandi jókst um 8.100 manns en hlutfall þeirra af mannfjölda lækkaði um 0,3 prósentustig.

Atvinnulausir voru um 2.100 færri en í maí árið 2017 og hlutfall þeirra lækkaði um 1,2 prósentustig. Alls voru 41.700 utan vinnumarkaðar í maí 2018 og hafði þeim fjölgað um 5.100 manns frá því í maí 2017 þegar þeir voru 36.600.

Flæðirit — Vinnumarkaður 16–74 ára, maí 2018

Samtala undirliða þarf ekki að koma heim við heildartölur vegna námundunar. Öryggisbil (95%), atvinnuleysi: Alls ±1,2; karlar ±1,8; konur ±1,7.

Árstíðaleiðrétt atvinnuleysi var 2,3% í maí 2018
Íslenskur vinnumarkaður sveiflast reglulega milli mánaða vegna árstíðabundinna þátta. Samkvæmt árstíðaleiðréttum tölum var fjöldi fólks á vinnumarkaði 204.900 í maí 2018. Atvinnuþáttaka var því 81,6% í maí, og minnkaði um 0,7 prósentustig frá því í apríl. Áætlaður fjöldi atvinnulausra í maí var samkvæmt árstíðaleiðréttingunni 4.700 og minnkaði um 2.400 manns frá áætluðum fjölda í apríl.
Hlutfall atvinnulausra lækkaði því úr 3,5% í apríl 2018 í 2,3% í maí 2018, eða um 1,2 prósentustig.

Leiðrétt hlutfall starfandi fólks í maí 2018 var 79,7%, sem er 0,3 prósentustigum hærra en það var í apríl. Áætlaður fjöldi utan vinnumarkaðar hækkaði úr 44.200 í 46.200 á milli mánaða, eða um 2.000 manns.
Nokkrar sveiflur má sjá í bæði mælingunni sjálfri og í árstíðaleiðréttum tölum, sérstaklega meðal ungs fólks á aldrinum 16–24 ára. Við slíkum árstíðarbundnum sveiflum er þó að búast þar sem þessi hópur fer jafnan í atvinnuleit að vori þegar skóla lýkur.

Ennfremur sýnir leitni hlutfalls þeirra sem eru utan vinnumarkaðar, starfandi og atvinnuleysis síðustu sex mánaða að almennt standa þessar vinnumarkaðstölur nánast í stað. Því má segja að íslenskur vinnumarkaður sé nokkuð stöðugur og í takti við útgefnar vinnumarkaðstölur seinustu 6 mánuði.

Framkvæmd
Maí 2018 í vinnumarkaðsrannsókninni nær til fimm vikna, frá 6. maí til og með 3. júní. Í úrtak völdust af handahófi 1.930 einstaklingar á aldrinum 16–74 ára sem höfðu lögheimili á Íslandi. Þegar frá eru taldir þeir sem voru látnir eða reyndust búsettir erlendis var nettóúrtakið 1.856 einstaklingar. Alls fengust nothæf svör frá 1.205 einstaklingum sem jafngildir 64,9% svarhlutfalli.

Allar tölur hafa verið vegnar eftir kyni og aldri. Vikmörk mánaðarlegra niðurstaðna mælinga fyrir maí 2018 um atvinnuþátttöku eru ±2,0 prósentustig, hlutfall starfandi ±2,2 prósentustig og atvinnuleysi ±1,2 prósentustig. Allar fjöldatölur eru námundaðar að næsta hundraði. Það skal tekið fram að áætlaðar tölur fyrir fyrstu tvo mánuði nýjasta ársfjórðungs eru bráðabrigðatölur þar til ársfjórðungi lýkur.

Talnaefni