Samkvæmt vinnumarkaðsrannsókn Hagstofu Íslands er áætlað að 209.700 manns á aldrinum 16–74 ára hafi að jafnaði verið á vinnumarkaði í júní 2018, en það jafngildir 84,0% atvinnuþátttöku. Af þeim voru 203.200 starfandi og 6.400 án vinnu og í atvinnuleit. Hlutfall starfandi af mannfjölda var 81,5% en hlutfall atvinnulausra af vinnuafli var 3,1%.

Samanburður mælinga fyrir júní 2017 og 2018 sýnir að vinnuaflið jókst um 3.900 manns en hlutfall þess af mannfjölda lækkaði um 1,4 prósentustig. Fjöldi starfandi jókst um 2.100 manns og hlutfall þeirra af mannfjölda lækkaði um 2,1 prósentustig.

Atvinnulausir voru um 1.700 fleiri en í júní árið 2017 og hlutfall þeirra jókst um 0,8 prósentustig. Alls voru 39.800 utan vinnumarkaðar í júní 2018 og hafði þeim fjölgað um 4.800 manns frá því í júní 2017 þegar þeir voru 35.000.

Flæðirit — Vinnumarkaður 16–74 ára, júní 2018

Samtala undirliða þarf ekki að koma heim við heildartölur vegna námundunar. Öryggisbil (95%), atvinnuleysi: Alls ±1,2; karlar ±1,6; konur ±2,1.

Árstíðaleiðrétt atvinnuleysi var 3,4% í júní 2018
Íslenskur vinnumarkaður sveiflast reglulega milli mánaða vegna árstíðabundinna þátta. Samkvæmt árstíðaleiðréttum tölum var fjöldi fólks á vinnumarkaði 201.200 í júní 2018. Atvinnuþáttaka var því 80,9% í júní, og minnkaði um 0,2 prósentustig frá því í maí. Áætlaður fjöldi atvinnulausra í júní var samkvæmt árstíðaleiðréttingunni 6.900 eða 3,4%.

Leiðrétt hlutfall starfandi fólks í maí 2018 var 78,1%, sem er 1,6 prósentustigum lægra en það var í maí.
Niðurstöður árstíðaleiðréttingarinnar um samanburð atvinnuleysis á milli síðustu mælinga ber að taka með fyrirvara. Nokkrar sveiflur má sjá hvort tveggja í mælingunni sjálfri og í árstíðaleiðréttum tölum, sérstaklega meðal ungs fólks á aldrinum 16–24 ára. Við slíkum árstíðarbundnum sveiflum er þó að búast þar sem þessi hópur fer jafnan í atvinnuleit að vori þegar skóla lýkur. Líkanið sem unnið er með gerir ráð fyrir að í venjulegu ári sé mæling á atvinnuleysi í maí nokkru hærra en það mælist í júní. Hins vegar þá mældist atvinnuleysi nánast það sama fyrir maí og júní. Þetta hefur þau áhrif að líkanið gerir ráð fyrir lægra atvinnuleysi í maí en það var í raun.

Þrátt fyrir þennan fyrirvara þá sýnir leitni hlutfalls þeirra sem eru utan vinnumarkaðar, starfandi og atvinnuleysis síðustu sex mánaða að almennt standa vinnumarkaðstölurnar nánast í stað. Því má enn segja að íslenskur vinnumarkaður sé nokkuð stöðugur og í takti við útgefnar vinnumarkaðstölur seinustu 6 mánuði.

Framkvæmd
Vinnumarkaðsrannsóknin í júní 2018 nær til fjögurra vikna, frá 4. júní til og með 1. júlí. Í úrtak völdust af handahófi 1.535 einstaklingar á aldrinum 16–74 ára sem höfðu lögheimili á Íslandi. Þegar frá eru taldir þeir sem voru látnir eða reyndust búsettir erlendis var nettóúrtakið 1.506 einstaklingar. Alls fengust nothæf svör frá 994 einstaklingum en það jafngildir 66,0% svarhlutfalli.

Allar tölur hafa verið vegnar eftir kyni og aldri. Vikmörk mánaðarlegra niðurstaðna mælinga fyrir maí 2018 um atvinnuþátttöku eru ±2,2 prósentustig, hlutfall starfandi ±2,3 prósentustig og atvinnuleysi ±1,3 prósentustig. Allar fjöldatölur eru námundaðar að næsta hundraði.

Talnaefni

Nánari upplýsingar

Deila