Samkvæmt vinnumarkaðsrannsókn Hagstofu Íslands voru að jafnaði 197.000 manns á aldrinum 16–74 ára á vinnumarkaði í desember 2016, sem jafngildir 83% atvinnuþátttöku. Af þeim voru 191.900 starfandi og 5.100 án vinnu og í atvinnuleit. Hlutfall starfandi af mannfjölda var 80,8% og hlutfall atvinnulausra af vinnuafli var 2,6%. Samanburður mælinga fyrir desember 2015 og 2016 sýnir að atvinnuþátttakan jókst um tvö prósentustig. Fjöldi starfandi jókst um 7.000 og hlutfallið af mannfjölda hækkaði um 1,4 stig. Atvinnulausum fjölgaði um 1.500 manns og hlutfall þeirra af vinnuaflinu hækkaði um 0,7 prósentustig.

Flæðirit — Vinnumarkaður 16–74 ára desember 2016

Samtala undirliða þarf ekki að koma heim við heildartölur vegna námundunar.

Árstíðaleiðrétt atvinnuleysi 2,9% í desember
Íslenskur vinnumarkaður sveiflast reglulega milli mánaða vegna árstíðabundinna þátta. Samkvæmt árstíðaleiðréttingu var fjöldi fólks á vinnumarkaði 200.300 í desember 2016 sem jafngildir 84,4% atvinnuþátttöku, sem er lækkun um 0,3 prósentustig frá nóvember. Fjöldi atvinnulausra í desember var samkvæmt árstíðaleiðréttingunni 5.900, sem er aðeins um hundrað manns færra en í áætluðum tölum fyrir nóvember. Hlutfall atvinnulausra lækkaði því lítillega á milli nóvember og desember eða um 0,l stig, úr 3,0% í 2,9%. Leiðrétt hlutfall starfandi fólks í desember 2016 var 81,9%, sem er 0,3 stigum lægra en í nóvember. Þegar horft er til síðustu sex mánaða þá sýnir leitni vinnuaflstalna að atvinnuleysi stendur nánast alveg í stað, en á síðustu tólf mánuðum hefur það lækkað um 0,4 prósentustig. Hlutfall starfandi síðustu sex mánuði hefur aftur á móti aukist lítillega eða um 0,4 stig og um 1,4 stig síðustu tólf mánuði.

Framkvæmd
Desember 2016 nær til fimm vikna, eða frá 28. nóvember til 1. janúar 2017. Úrtakið var 1.513 einstaklingar á aldrinum 16–74 ára sem valdir voru af handahófi úr þjóðskrá. Þegar frá eru taldir þeir sem voru látnir eða búsettir erlendis reyndist nettóúrtakið 1.469 einstaklingar. Alls fengust nothæf svör frá 1.056 einstaklingum sem jafngildir 71,9% af endanlegri svörun. Allar tölur hafa verið vegnar eftir kyni og aldri. Vikmörk mánaðarlegra niðurstaðna um atvinnuþátttöku eru ±2,2 stig, hlutfall starfandi ±2,3 stig og og atvinnuleysi ±1,1 stig. Allar fjöldatölur eru afrúnaðar að næsta hundraði.

Talnaefni