Samkvæmt vinnumarkaðsrannsókn Hagstofu Íslands voru að jafnaði 200.800 manns á aldrinum 16–74 ára á vinnumarkaði í ágúst 2017, sem jafngildir 83,1% atvinnuþátttöku. Af þeim voru 195.800 starfandi og 5.000 án vinnu og í atvinnuleit. Hlutfall starfandi af mannfjölda var 81% og hlutfall atvinnulausra af vinnuafli var 2,5%. Samanburður mælinga fyrir ágúst 2016 og 2017 sýna að atvinnuþátttaka dróst saman um 2,3 prósentustig úr 85,3% í ágúst 2016. Fjöldi starfandi er nánast alveg sá sami í fjölda talið en hlutfall starfandi af mannfjölda minnkaði um 1,9 stig. Atvinnulausir voru þó 800 færri en í ágúst 2016 þegar hlutfallið var 2,9%. Þeir sem standa utan vinnumarkaðar samkvæmt mælingunni eru 40.900 sem er um 6.300 fleiri en í ágúst 2016 en þá voru þeir 34.600.

Flæðirit — Vinnumarkaður 16–74 ára ágúst 2017

Samtala undirliða þarf ekki að koma heim við heildartölur vegna námundunar.

Árstíðaleiðrétt atvinnuleysi 2,7% í ágúst
Íslenskur vinnumarkaður sveiflast reglulega milli mánaða vegna árstíðabundinna þátta. Samkvæmt árstíðaleiðréttingu var fjöldi fólks á vinnumarkaði 196.400 í ágúst 2017 sem jafngildir 82% atvinnuþátttöku, sem er hækkun um 0,4 prósentustig frá júlí 2017. Fjöldi atvinnulausra í ágúst var samkvæmt árstíðaleiðréttingunni 5.300 og fjölgaði um 1.300 manns frá áætluðum fjölda atvinnulausra í júlí. Hlutfall atvinnulausra hækkaði því á milli júlí og ágúst 2017 um 0,6 stig, úr 2,1% í 2,7%. Leiðrétt hlutfall starfandi fólks í ágúst 2017 var 79,8%, sem sem er nánast óbreytt frá júlímánuði. Þegar horft er til síðustu sex mánaða þá sýnir leitni vinnuaflstalna að atvinnuþátttaka hefur dregist saman um 0,6 stig og hlutfall starfandi lækkað um 0,6 stig. Atvinnuleysi stendur hins vegar nánast í stað.

Framkvæmd
Ágúst 2017 nær til fimm vikna, eða frá 31. júlí til 3. september. Úrtakið var 1.507 einstaklingar á aldrinum 16–74 ára sem valdir voru af handahófi úr þjóðskrá. Þegar frá eru taldir þeir sem voru látnir eða búsettir erlendis reyndist nettóúrtakið 1.466 einstaklingar. Alls fengust nothæf svör frá 1.020 einstaklingum sem jafngildir 69,6% af endanlegri svörun. Allar tölur hafa verið vegnar eftir kyni og aldri. Vikmörk mánaðarlegra niðurstaðna um atvinnuþátttöku eru ±2,2 stig, hlutfall starfandi ±2,4 stig og atvinnuleysi ±1,2 stig. Allar fjöldatölur eru afrúnaðar að næsta hundraði. Tölur fyrir fyrstu tvo mánuði nýjasta ársfjórðungsins eru bráðabirgðatölur þar til ársfjórðungi lýkur.

Talnaefni