FRÉTT VINNUMARKAÐUR 17. ÁGÚST 2017

Á öðrum ársfjórðungi 2017 voru að jafnaði 202.500 manns á aldrinum 16–74 ára á vinnumarkaði. Af þeim voru 195.600 starfandi og 7.000 án vinnu og í atvinnuleit. Atvinnuþátttaka mældist 84,4%, hlutfall starfandi mældist 81,5% og atvinnuleysi var 3,4%. Frá öðrum ársfjórðungi 2016 fjölgaði starfandi fólki um 3.500 en hlutfall af mannfjölda lækkaði um 0,4 prósentustig. Atvinnulausum fækkaði á sama tíma um 200 manns og hlutfall atvinnulausra af vinnuafli lækkaði um 0,2 prósentustig. Atvinnulausar konur voru 3.300 og var atvinnuleysi á meðal kvenna 3,5%. Atvinnulausir karlar voru 3.700 eða 3,4%. Atvinnuleysi var 3,9% á höfuðborgarsvæðinu og 2,6% utan þess.

Langtímaatvinnuleysi 5,5%
Af þeim sem voru atvinnulausir á öðrum ársfjórðungi 2017 voru að jafnaði 4.200 manns búnir að vera atvinnulausir í 2 mánuði eða skemur eða 60% atvinnulausra. Á öðrum ársfjórðungi 2016 höfðu um 3.100 einstaklingar verið atvinnulausir í 2 mánuði eða skemur sem þá voru 42,6% atvinnulausra.

Þeir sem hafa verið atvinnulausir í 12 mánuði eða lengur eru skilgreindir sem langtímaatvinnulausir. Á árunum 2009 til 2012 jókst langtímaatvinnuleysi til muna hér á landi en er nú aftur komið í svipað horf og var fyrir þann tíma. Á öðrum ársfjórðungi 2017 höfðu um 400 manns verið langtímaatvinnulausir eða 5,5% atvinnulausra samanborið við 800 manns á öðrum ársfjórðungi 2016, sem þá voru 11% atvinnulausra. Ef hlutfallið er tekið af öllum á vinnumarkaði þá voru 0,2% langtímaatvinnulausir samanborið við 0,4% árið áður.

Vinnutími
Á öðrum ársfjórðungi 2017 voru að jafnaði 178.100 manns við vinnu í hverri viku ársfjórðungsins eða 91,7% starfandi fólks og 74,2% af heildarmannfjölda 16-74 ára. Meðalfjöldi heildarvinnustunda á viku voru 40,6 klst. hjá þeim sem voru við vinnu í viðmiðunarvikunni, 44,7 klst. hjá þeim sem voru í fullu starfi og 24,7 klst. hjá þeim sem voru í hlutastarfi.

Vinnumarkaður á 2. ársfjórðungi 2017 - Hagtíðindi

Talnaefni

Nánari upplýsingar

Nánari upplýsingar eru veittar í síma 528 1284 , netfang kannanir@hagstofa.is

Deila


Öllum eru heimil afnot af fréttatilkynningunni. Vinsamlegast getið heimildar.