Atvinnuleysi 2,5%
Á þriðja ársfjórðungi 2008 voru að meðaltali 4.800 manns án vinnu og í atvinnuleit eða 2,5% vinnuaflsins. Atvinnuleysi mældist 2,6% hjá körlum og mjög svipað eða 2,5% hjá konum. Þegar litið er til aldurs var atvinnuleysið mest meðal fólks á aldrinum 16-24 ára, eða 4,8%.
Á þriðja ársfjórðungi 2007 mældist atvinnuleysi 2,1%. Atvinnuleysi mældist þá 1,6% hjá körlum og 2,7% hjá konum. Atvinnuleysi var mest meðal fólks á aldrinum 16-24 ára eða 5,2%.
Atvinnulausir teljast þeir sem ekki hafa atvinnu í viðmiðunarviku könnunarinnar, eru að leita að vinnu og geta hafið störf innan tveggja vikna eða hafa fengið vinnu sem hefst innan 3 mánaða. Einstaklingar, sem eru ekki í vinnu en eru í námi, flokkast atvinnulausir ef þeir uppfylla skilyrðin hér að ofan.
33,5% atvinnulausra höfðu leitað að vinnu í innan við einn mánuð og 20,3% höfðu fengið vinnu sem hefst síðar
Af þeim sem voru atvinnulausir á þriðja ársfjórðungi 2008 voru nær 1.000 búnir að finna vinnu sem hefst síðar, eða 20,3%. Tæp 1.600 manns eða 33,5% voru búnir að leita skemur en einn mánuð að vinnu. Af þeim sem voru atvinnulausir höfðu um 300 manns, eða 5,7% leitað að vinnu í 6 mánuði eða lengur.
Tafla 1. Atvinnulausir á 3. ársfjórðungi eftir lengd atvinnuleitar | ||||||||
2005 | 2006 | 2007 | 2008 | |||||
Fjöldi | % | Fjöldi | % | Fjöldi | % | Fjöldi | % | |
Atvinnulausir | 3.000 | 100,0 | 4.600 | 100,0 | 3.900 | 100,0 | 4.800 | 100,0 |
Búinn að fá vinnu sem hefst síðar | 500* | 15,3* | 1.400 | 30,4 | 1.000 | 24,7 | 1.000 | 20,3 |
Innan við einn mánuður | 1.200 | 40,5 | 1.900 | 40,5 | 1.600 | 42,5 | 1.600 | 33,5 |
1-2 mánuðir | 400* | 12,6* | 300* | 6,9* | 700* | 19,0* | 1.600 | 32,9 |
3-5 mánuðir | 300* | 9,4* | 300* | 6,9* | 200* | 5,1* | 400* | 7,6* |
6 mánuðir eða lengur | 700* | 22,2* | 700* | 15,4* | 300* | 8,6* | 300* | 5,7* |
Hlutföll eru reiknuð af fjöldatölum áður en þær eru námundaðar á næsta hundrað. | ||||||||
* frávikshlutfall yfir 20% |
Starfandi fólk 183.800 og atvinnuþátttakan var 83,8%
Fjöldi starfandi á þriðja ársfjórðungi 2008 var um 183.800 manns eða 81,7%. Á vinnumarkaði voru um 188.500 manns sem jafngildir 83,8% atvinnuþátttöku. Atvinnuþátttaka karla var 88,2% og kvenna 79,0%. Til þeirra sem eru á vinnumarkaði teljast bæði þeir sem eru starfandi og atvinnulausir. Fólk telst vera starfandi ef það hefur unnið eina klukkustund eða meira í viðmiðunarviku könnunar eða verið fjarverandi frá starfi sem það gegnir að öllu jöfnu.
Á þriðja ársfjórðungi 2007 voru um 184.700 á vinnumarkaði og atvinnuþátttaka mældist 84,1%. Atvinnuþátttaka karla var 88,2% og kvenna 79,6%.
Vinnutími 43,6 klst. á viku
Á þriðja ársfjórðungi 2008 var meðalfjöldi vinnustunda 43,6 klst. hjá þeim sem voru við vinnu í viðmiðunarvikunni, 48,2 klst. hjá körlum en 37,3 klst. hjá konum. Meðalfjöldi vinnustunda hjá þeim sem voru í fullu starfi var 47,1 klst., 49,8 klst. hjá körlum en 42,5 klst. hjá konum. Meðalfjöldi vinnustunda hjá þeim sem voru í hlutastarfi voru 25,4 klst., 24,4 klst. hjá körlum en 25,7 klst. hjá konum.
Á þriðja ársfjórðungi 2007 var fjöldi vinnustunda 43,3 klst., 47,6 klst. hjá körlum en 37,4 klst. hjá konum. Þeir sem voru í fullu starfi unnu 47,1 klst. að jafnaði en þeir sem voru í hlutastarfi unnu að jafnaði 26,0 klst.
Tafla 2. Atvinnuþátttaka, atvinnuleysi og fjöldi starfandi á 3. ársfjórðungi | ||||||
2005 | 2006 | 2007 | 2008 | 2008 | ||
3. ársfj. | 3. ársfj. | 3. ársfj. | 3. ársfj. | Vikmörk ± | ||
Atvinnuþátttaka | Hlutfallstölur | 83,1 | 84,2 | 84,1 | 83,8 | 1,1 |
Hlutfall starfandi | Hlutfallstölur | 81,6 | 82,0 | 82,3 | 81,7 | 1,2 |
Atvinnuleysi | Hlutfallstölur | 1,8 | 2,6 | 2,1 | 2,5 | 0,6 |
Vinnuafl | Áætlaður fjöldi | 167.000 | 177.900 | 184.700 | 188.500 | 2.600 |
Starfandi | Áætlaður fjöldi | 164.000 | 173.300 | 180.900 | 183.800 | 2.800 |
Atvinnulausir | Áætlaður fjöldi | 2.900 | 4.600 | 3.800 | 4.800 | 1.100 |
Starfandi í fullu starfi | Áætlaður fjöldi | 132.300 | 140.300 | 145.000 | 151.900 | 2.500 |
Starfandi í hlutastarfi | Áætlaður fjöldi | 31.700 | 33.000 | 35.800 | 31.910 | 2.500 |
Heildarvinnutími | Klukkustundir | 43,8 | 44,1 | 43,3 | 43,6 | 0,6 |
Vinnutími í fullu starfi | Klukkustundir | 48,1 | 47,9 | 47,1 | 47,1 | 0,6 |
Vinnutími í hlutastarfi | Klukkustundir | 24,7 | 26,6 | 26,0 | 25,4 | 1,4 |
Utan vinnumarkaðar | Áætlaður fjöldi | 34.000 | 33.500 | 35.000 | 36.500 | 2.600 |
Mannfjöldi | Áætlaður fjöldi | 201.000 | 211.400 | 219.800 | 225.000 | |
Hlutföll eru reiknuð af fjöldatölum áður en þær eru námundaðar á næsta hundrað. |
Framkvæmd
Frá og með ársbyrjun 2003 hefur Hagstofan framkvæmt samfellda vinnumarkaðsrannsókn sem gefur niðurstöður fyrir hvern ársfjórðung. Þriðji ársfjórðungur 2008 nær til 13 vikna, frá 30. júní til 28. september. Heildarúrtakið var 3.928 manns á aldrinum 16–74 ára sem valdir voru af handahófi úr þjóðskrá. Þegar frá eru taldir þeir sem voru látnir eða búsettir erlendis reyndist nettóúrtakið vera 3.846 einstaklingar. Alls fengust nothæf svör frá 3.116 einstaklingum sem jafngildir 81,0% endanlegri svörun. Allar tölur hafa verið vegnar eftir kyni og aldri. Vikmörk niðurstaðna um atvinnuþátttöku eru ± 1,1%, atvinnuleysi ± 0,6% og vinnutíma ± 0,6 klukkustund.