Samkvæmt vinnumarkaðsrannsókn Hagstofu Íslands voru að jafnaði 197.500 á aldrinum 16-74 ára á vinnumarkaði í júlí 2015, sem jafngildir 84,5% atvinnuþátttöku. Af þeim voru 191.200 starfandi og 6.300 án vinnu og í atvinnuleit. Hlutfall starfandi af mannfjölda var 81,8% og hlutfall atvinnulausra af vinnuafli var 3,2%. Samanburður mælinga fyrir júlí 2014 og 2015 sýnir að atvinnuþátttaka minnkaði um 0,5 prósentustig. Hlutfall starfandi fólks af mannfjölda minnkaði um 0,3 stig og atvinnuleysi var nánast það sama og það var í júlí 2014.

Flæðirit – Vinnumarkaður 16-74 ára, júlí 2015

Samtala undirliða kann að vera ósamhljóða heildarniðurstöðu
vegna þess að tölur eru jafnaðar.

Árstíðaleiðrétt atvinnuleysi 4,3% í júlí
Samkvæmt árstíðaleiðréttingu var fjöldi fólks á vinnumarkaði 190.600 í júlí 2015 sem jafngildir 81,9% atvinnuþátttöku, sem er 1,3 prósentustigum lægri en hún var í júní. Fjöldi atvinnulausra í júlí var samkvæmt árstíðaleiðréttingu 8.100 sem er aukning um 1.800 manns frá því í júní. Hlutfall atvinnulausra jókst úr 3,3% í maí í 4,3% í júlí. Leiðrétt hlutfall starfandi fólks í júlí 2015 var 78,4%, sem er lækkun um tvö prósentustig frá því í júní. Þrátt fyrir þessa aukningu á milli mánaða þá sýnir leitni vinnuaflstalna að atvinnuleysi lækkar enn, eða um 0,2 prósentustig sé horft til síðustu sex mánaða og um 0,7 stig á síðustu tólf mánuðum. Hlutfall starfandi síðustu sex mánuði hefur aukist um 0,6 prósentustig og um eitt stig síðustu tólf mánuði.

Framkvæmd og aðferð
Mælingar sýna að íslenskur vinnumarkaður breytist reglulega í tilteknum mánuðum og stafar breytileikinn af ýmsum árstíðabundnum þáttum, eins og sjá má á myndunum hér að framan. Árstíðaleiðrétting er tölfræðileg aðferð sem leitast við að aðgreina árstíðabundnar sveiflur frá óreglulegum breytingum. Árstíðaleiðréttingin gerir samanburð á milli samliggjandi mánaða mun raunhæfari og segir betur um hvert tölurnar stefna. Vegna eðli árstíðaleiðréttinga hafa nýjar mælingar áhrif á alla tímaröðina. Hagstofa Íslands notar Tramo-Seats aðferð við árstíðaleiðréttingu.

Júlí 2015 nær til fimm vikna, frá 30. júní til 2. ágúst. Úrtakið var 1.528 einstaklingar á aldrinum 16–74 ára sem valdir voru af handahófi úr þjóðskrá. Þegar frá eru taldir þeir sem voru látnir eða búsettir erlendis reyndist nettóúrtakið 1.487 einstaklingar. Alls fengust nothæf svör frá 1.147 einstaklingum sem jafngildir 77,1% af endanlegri svörun. Allar tölur hafa verið vegnar eftir kyni og aldri. Vikmörk mánaðarlegra niðurstaðna um atvinnuþátttöku eru ±2,0, hlutfall starfandi ±2,2 og atvinnuleysi ±1,1. Allar fjöldatölur eru afrúnaðar að næsta hundraði.

Talnaefni