Vísitala neysluverðs miðuð við verðlag í nóvember 2008 er 327,9 stig (maí 1988=100) og hækkaði um 1,74% frá fyrra mánuði. Vísitala neysluverðs án húsnæðis er 298,3 stig og hækkaði hún um 1,84% frá október.

Verð á mat og drykkjarvöru hækkaði um 3,6% (vísitöluáhrif 0,46%), verð á áfengi og tóbaki hækkaði um 6,5% (0,17%) og verð á fötum og skóm um 3,0% (0,14%). Verð á húsgögnum, heimilistækjum, heimilisbúnaði o.fl. hækkaði um 3,4% (0,24%), verð á sjónvörpum, dvd-spilurum, tölvum um 6,9% (0,11%) og efni til viðhalds húsnæðis hækkaði um 7,0% (0,29%).

Verð á nýjum bílum hækkaði um 1,1% (0,08%). Sala nýrra bíla hefur dregist verulega saman og þess vegna mælir Hagstofan nú eingöngu breytingu á verði þeirra bíla sem seldir eru í stað þess að miða við listaverð á öllum bílum. Við útreikninginn styðst Hagstofan við tölur um nýskráningar bifreiða sem birtar eru á vef Umferðarstofu og upplýsingar um söluverð frá bílaumboðunum.

Síðastliðna tólf mánuði hefur vísitala neysluverðs hækkað um 17,1% en vísitala neysluverðs án húsnæðis um 19,5%. Undanfarna þrjá mánuði hefur vísitala neysluverðs hækkað um 4,8% sem jafngildir 20,8% verðbólgu á ári (27,4% fyrir vísitöluna án húsnæðis).

Vísitala neysluverðs samkvæmt útreikningi í nóvember 2008, sem er 327,9 stig gildir til verðtryggingar í janúar 2009. Vísitala fyrir eldri fjárskuldbindingar, sem breytast eftir lánskjaravísitölu, er 6.474 stig fyrir janúar 2009.

Talnaefni