Vísitala neysluverðs miðuð við verðlag í miðjum febrúar 2008 er 286,2 stig (maí 1988=100) og hækkaði um 1,38% frá fyrra mánuði. Vísitala neysluverðs án húsnæðis er 254,9 stig og hækkaði um 1,55% frá janúar.

Kostnaður vegna reksturs eigin bifreiðar jókst um 2,5% (vísitöluáhrif 0,36%). Þar af hækkaði verð á nýjum bílum um 2,6% (0,16%) og á bensíni og olíum um 3,6% (0,18%).

Vetrarútsölum er að ljúka og hækkaði verð á fötum og skóm um 9,1% (0,35%). Kostnaður vegna eigin húsnæðis jókst um 1,0% (0,20%), þar af voru 0,15% áhrif vegna hærri raunvaxta og 0,05% vegna hækkunar á markaðsverði húsnæðis. Þá hækkaði verð á mat og drykkjarvöru um 0,9% (0,12%).

Síðastliðna tólf mánuði (miðað við verðlag í upphafi mánaðar í fyrra en um miðjan mánuð nú) hefur vísitala neysluverðs hækkað um 6,8% en vísitala neysluverðs án húsnæðis um 3,9%. Fastskattavísitala neysluverðs hefur hækkað um 8,7% síðastliðna tólf mánuði og fastskattavísitala neysluverðs án húsnæðis um 6,4%. Undanfarna þrjá mánuði hefur vísitala neysluverðs hækkað um 2,3% sem jafngildir 9,3% verðbólgu á ári (8,6% fyrir vísitöluna án húsnæðis).

Vísitala neysluverðs samkvæmt útreikningi í miðjum febrúar 2008, 286,2 stig, gildir til verðtryggingar í apríl 2008. Vísitala fyrir eldri fjárskuldbindingar, sem breytast eftir lánskjaravísitölu, er 5.651 stig fyrir apríl 2008.

Nú er í fyrsta sinn birt kjarnavísitala 3, sem er kjarnavísitala 2 án áhrifa af breytingum raunvaxta á húsnæðislið vísitölu neysluverðs. Vísitalan var unnin í samráði við Seðlabanka Íslands og hefur verið reiknuð aftur til janúar 2004. Nánari grein verður gerð fyrir kjarnavísitölu 3 í Hagtíðindahefti um vísitölu neysluverðs sem gefið verður út 16. maí 2008.

Fyrirhugaðri birtingu á talnaefni fyrir undirvísitölur þar sem viðmiðunartíma talnaefnis er breytt og miðað við janúar 2008=100 hefur verið frestað til apríl 2008.