Fluttar voru út vörur fyrir 66,9 milljarða króna fob í september 2021 og inn fyrir 85,7 milljarða króna cif (78,7 milljarða króna fob) samkvæmt bráðabirgðatölum. Vöruviðskiptin í september, reiknuð á fob/cif-verðmæti, voru því óhagstæð um 18,8 milljarða króna.
Til samanburðar voru vöruviðskiptin reiknuð á fob/cif-verðmæti óhagstæð um 11,6 milljarða króna í september 2020 á gengi hvors árs fyrir sig. Vöruskiptajöfnuðurinn í september 2021 var því 7,2 milljörðum óhagstæðari en á sama tíma fyrir ári. Vöruskiptajöfnuður síðustu tólf mánaða var óhagstæður um 213,6 milljarða króna sem er 61,3 milljörðum króna óhagstæðari jöfnuður en á tólf mánaða tímabili ári fyrr.
Verðmæti útflutnings jókst um 16,4% á tólf mánaða tímabili
Verðmæti vöruútflutnings í september 2021 jókst um 5,9 milljarða króna, eða um 9,7%, frá september 2020, úr 61,0 milljarði króna í 66,9 milljarða. Verðmæti útfluttra iðnaðarvara jókst um 11,7 milljarða króna, eða 46% samanborið við september 2020, og munar þar mest um aukið útflutningsverðmæti áls. Útflutningsverðmæti sjávarafurða minnkaði um fimm milljarða, eða um 17%, og munar þar mestu um lækkun á verðmæti í ferskum fiski og frystum heilum fiski.
Verðmæti vöruútflutnings á tólf mánaða tímabili, frá október 2020 til september 2021, var 708,6 milljarðar króna og hækkaði um 99,9 milljarða króna miðað við sama tímabil ári fyrr eða um 16,4% á gengi hvors árs. Iðnaðarvörur voru 50% alls vöruútflutnings síðustu tólf mánaði og var verðmæti þeirra 21% meira en á tólf mánaða tímabili þar á undan. Sjávarafurðir voru 40% alls vöruútflutnings síðustu tólf mánuði en verðmæti þeirra jókst um 7,8% á milli tólf mánaða tímabila. Verðmæti útflutnings í fiskeldi jókst um 7,2 milljarða, eða 25,2%, á sama tímabili og var um 5% af heildarútflutningsverðmæti síðustu tólf mánaða.
Verðmæti vöruinnflutnings jókst um 21,2% á tólf mánaða tímabili
Verðmæti vöruinnflutnings nam 85,7 milljörðum króna í september 2021 samanborið við 72,6 milljarða í september í fyrra. Verðmæti fjárfestingavara jókst um tæpa sex milljarða króna (41,4%), verðmæti eldsneytis jókst um 2,4 milljarða króna (52,2%) og verðmæti hrá- og rekstrarvara jókst um 2,6 milljarða (11 %).
Verðmæti vöruinnflutnings síðustu tólf mánuði var 922,1 milljarður króna og jókst um 161,1 milljarð króna miðað við tólf mánuði þar á undan eða 21,2% á gengi hvors árs fyrir sig. Aukningin á þessu tólf mánaða tímabili var mest í hrá- og rekstrarvörum, fjárfestingarvörum og flutningatækjum.
Meðaltal gengisvísitölu1 síðustu tólf mánuði var 198,6 og var gengið 2,1% veikara en á fyrra tólf mánaða tímabili þegar meðaltal gengisvísitölu var 194,5. Gengið styrktist aftur á móti um 5,9% í september (197,2) samanborið við september 2020 (209,5). Í þessari frétt er um bráðabirgðatölur að ræða og niðurstöður gætu breyst eftir endurskoðun í lok mánaðar.
| Verðmæti út- og innflutnings á tólf mánaða tímabili | |||
| Milljarðar króna á gengi hvors árs | Október 2019 - september 2020 | Október 2020 - september 2021 | Breyting frá fyrra tímabili, % |
| Útflutningur alls fob | 608,7 | 708,6 | 16,4 |
| Sjávarafurðir | 265,4 | 286,2 | 7,8 |
| Landbúnaðarafurðir þ.m.t. eldisfiskur | 34,5 | 44,3 | 28,3 |
| Iðnaðarvörur | 293,1 | 354,5 | 21,0 |
| Aðrar vörur | 15,7 | 23,6 | 50,0 |
| Innflutningur alls cif | 761,0 | 922,1 | 21,2 |
| Matvörur og drykkjarvörur | 80,4 | 88,1 | 9,6 |
| Hrávörur og rekstrarvörur, ót.a. | 225,6 | 272,2 | 20,7 |
| Eldsneyti og smurolíur | 62,2 | 58,8 | -5,4 |
| Fjárfest.vörur (þó ekki flutn.tæki) | 165,8 | 208,9 | 26,0 |
| Flutningatæki | 103,8 | 141,7 | 36,5 |
| Neysluvörur ót.a. | 122,6 | 152,1 | 24,1 |
| Vörur ót.a (t.d. endursendar vörur) | 0,6 | 0,2 | -61,0 |
| Vöruskiptajöfnuður | -152,3 | -213,6 | |
1 Heimild: Seðlabanki Íslands- gengisvísitala (vísitala meðalgengis - viðskiptavog þröng).