Samkvæmt bráðabirgðatölum var vöru- og þjónustujöfnuður á öðrum ársfjórðungi 2017, eins og hann birtist í þjóðhagsreikningum og greiðslujöfnuði, jákvæður um 14,7 milljarða en hann var jákvæður um 25,1 milljarð á sama tíma árið 2016, á gengi hvors árs. Umreiknaður vöruskiptajöfnuður var óhagstæður um 45,8 milljarða króna en þjónustujöfnuður var hagstæður um 60,5 milljarða.
Heildarútflutningstekjur vegna vöru- og þjónustuviðskipta námu 300,7 milljörðum króna en heildarinnflutningur á vörum og þjónustu nam 286 milljörðum króna.
Í bráðabirgðatölum fyrir fyrri helming ársins 2017 var vöru- og þjónustujöfnuður við útlönd því jákvæður um 20,3 milljarða en var jákvæður um 27,3 milljarða á fyrri helming ársins 2016.
Í lokatölum fyrir árið 2016 var vöru- og þjónustujöfnuður jákvæður um 155,4 milljarða en var jákvæður um 163,9 milljarða á árinu 2015.
Þessar upplýsingar koma fram í brúartöflu á vef Hagstofunnar sem samræmir staðla vöruviðskipta og greiðslujafnaðar.