Aflaverðmætið 24,8 milljarðar króna 

Á fyrstu fjórum mánuðum ársins 2004 var aflaverðmæti íslenskra skipa af öllum miðum nærri 24,8 milljarðar króna samanborið við 25,1 milljarð á sama tímabili 2003. Aflaverðmæti hefur því dregist saman um 1,3% á milli ára eða um nærri 330 milljónir króna, á verðlagi hvors árs. Verðmæti botnfiskaflans var 18 milljarðar króna og jókst um tæpar 390 milljónir króna (2,2%). Verðmæti þorsks var 12 milljarðar króna og jókst um tæpan milljarð króna (9%). Verðmæti ýsuaflans nam 2,7 milljörðum króna og jókst verðmæti hans um 540 milljónir króna (24,8%). Verðmæti karfa var 1,7 milljarðar króna og dróst því saman um rúmar 550 milljónir króna (-24,6%). Verðmæti loðnuaflans nam 3,6 milljörðum króna og dróst saman um rúmar 600 milljónir króna (-14,3%). Þá var verðmæti skel- og krabbadýraafla 647 milljónir króna en var rúmur milljarður króna á sama tímabili 2003.
       Verðmæti afla í beinni sölu útgerða til vinnslustöðva var á tímabilinu 12,2 milljarðar króna samanborið við tæplega 13 milljarða á árinu 2003 og er það samdráttur um 5,8%. Verðmæti sjófrysts afla var 5,9 milljarðar króna og er það sama verðmæti og 2003. Verðmæti afla sem seldur var á fiskmörkuðum til fiskvinnslu innanlands dróst saman um 5,1%, var 3,9 milljarðar króna samanborið við 4,1 milljarð króna á sama tímabili 2003. Í gámum var fluttur út ferskur fiskur fyrir 2,3 milljarða króna sem er aukning frá fyrra ári um 868 milljónir króna (60,7%). 
       Á Suðurnesjum var unnið úr afla að verðmæti 5,1 milljarður króna og er það aukning um 142 milljónir króna á milli ára eða 2,9%. Mestur samdráttur milli ára varð á Austurlandi, 444 milljónir króna eða sem nemur 12,5%. Verðmæti afla íslenskra skipa sem unninn var erlendis jókst um 42,5%, úr 1,5 milljörðum króna á fyrstu fjórum mánuðum ársins 2003 í nærri 2,2 milljarða króna á sama tímabili 2004.
       Upplýsingar um afla og aflaverðmæti janúar-apríl 2004 er að finna í talnaefni.

Talnaefni