Innflytjendur á Íslandi voru 77.226 eða 19,6% mannfjöldans þann 1. janúar 2026. Innflytjendum hefur haldið áfram að fjölga en þeir voru 18,9% landsmanna (73.795) í fyrra. Frá árinu 2012 hefur hlutfallið farið úr 7,4% mannfjöldans upp í 19,6%. Innflytjendum af annarri kynslóð fjölgaði einnig á milli ára, voru 7.838 í byrjun árs 2025 en 8.351 árið 2026. Samanlagt var fyrsta og önnur kynslóð innflytjenda 21,7% af mannfjöldanum og hefur það hlutfall aldrei verið hærra. Einstaklingum með erlendan bakgrunn, öðrum en innflytjendum, fjölgaði einnig lítillega á milli ára og voru 7,4% mannfjöldans.
Innflytjandi er einstaklingur sem er fæddur erlendis og á foreldra, afa og ömmur sem öll eru fædd erlendis. Innflytjendur af annarri kynslóð eru einstaklingar sem fæddir eru á Íslandi og eiga foreldra sem báðir eru innflytjendur. Fólk er talið hafa erlendan bakgrunn ef annað foreldrið er erlent. Einstaklingur sem fæddist erlendis en á foreldra sem báðir eru fæddir hér á landi telst einnig hafa erlendan bakgrunn.
Pólverjar fjölmennastir
Eins og síðustu ár reyndust Pólverjar langfjölmennasti hópur innflytjenda hér á landi. Innflytjendur frá Póllandi voru þannig 23.055 eða 29,9% allra innflytjenda þann 1. janúar síðastliðinn. Þar á eftir komu einstaklingar frá Úkraínu (6,1%) og Litháen (4,9%). Pólskir karlar voru 31,1% allra karlkyns innflytjenda eða 13.060 af 41.711. Litháískir karlar voru næst fjölmennastir (5,8%) og síðan komu karlar með uppruna frá Rúmeníu (5,6%). Pólskar konur voru 28,2% kvenkyns innflytjenda, næst á eftir þeim komu konur frá Úkraínu (7,0%) og þá konur frá Filippseyjum (5,5%).
34% íbúa á Suðurnesjum innflytjendur
Þann 1. janúar síðastliðinn bjuggu 55.467 fyrstu og annarrar kynslóðar innflytjendur á höfuðborgarsvæðinu eða 64,8% allra innflytjenda á landinu. Hlutfall innflytjenda af mannfjölda var mest á Suðurnesjum en þar voru 34% innflytjendur af fyrstu eða annarri kynslóð. Næsthæst var hlutfallið á Vestfjörðum þar sem 25,4% mannfjöldans voru innflytjendur og börn þeirra. Lægst var hlutfallið á Norðurlandi vestra en þar voru 11,8% mannfjöldans innflytjendur og börn þeirra.
1.085 einstaklingar fengu íslenskt ríkisfang árið 2025
Árið 2025 fengu 1.085 einstaklingar íslenskan ríkisborgararétt samanborið við 638 árið 2024. Aldrei hafa fleiri fengið íslenskan ríkisborgararétt á einu ári. Af þeim 1.085 einstaklingum sem fengu íslenskt ríkisfang höfðu langflestir áður verið með pólskt ríkisfang eða 199 og næstflestir verið með ríkisfang frá Filippseyjum (79). Árið 1991 fengu fleiri karlar en konur íslenskt ríkisfang en á hverju ári eftir það hafa konur verið í meirihluta þeirra sem fengið hafa íslenskra ríkisborgararétt. Það átti einnig við árið 2025 þegar 583 konur fengu íslenskan ríkisborgararétt en 502 karlar.
Frjósemi kvenna með íslenskt ríkisfang 1,78 árið 2025
Helsti mælikvarði á frjósemi er fjöldi lifandi fæddra barna á ævi hverrar konu. Yfirleitt er miðað við að frjósemi þurfi að vera um 2,1 barn til að viðhalda mannfjölda til lengri tíma litið. Árið 2025 var frjósemi kvenna búsettra á Íslandi 1,56 og hefur hún aldrei verið minni frá því að mælingar hófust árið 1853 fyrir utan árið 2024 þegar frjósemi var einnig 1,56. Frjósemi kvenna með íslenskt ríkisfang var 1,78 árið 2025 og jókst frá árinu 2024 þegar hún var 1,77. Frjósemi kvenna með erlent ríkisfang var 1,09 og hefur aldrei verið minni.
Talnaefni
Bakgrunnur
Fæddir