Árið 2007 fæddust 4.560 börn hérlendis, 2.359 drengir og 2.201 stúlka. Það eru fleiri börn en ári áður, en þá  fæddust hér 4.415 börn. Frjósemi íslenskra kvenna var heldur meiri árið 2007 en nokkur síðustu ár en hún er reiknuð sem fjöldi lifandi fæddra barna á ævi hverrar konu (uppsafnað frjósemishlutfall). Árið 2007 mældist frjósemi hérlendis 2,1 barn á ævi hverrar konu, samanborið við 2,07 börn árið 2006 og 2,05 börn árið 2005. Undanfarna tvo  áratugi hefur frjósemi hérlendis verið í kring um 2 börn á ævi hverrar konu að meðaltali. Ef horft er til þróunarinnar á tuttugustu öldinni var frjósemi hérlendis afar há í evrópsku samhengi á sjötta áratug aldarinnar. Hámarki náði frjósemin í  lok sjötta áratugarins og upphafi þess sjöunda  en þá gátu íslenskar konur vænst þess að eiga 4,1 barn um ævina.

Frjósemi á Íslandi er nú hærri en annars staðar í Evrópu (Tyrkland undanskilið). Næst hæst var hún í Frakklandi (2,0) árið 2006. Samanborið við önnur lönd í Evrópu var fæðingartíðni einnig há annars staðar á Norðurlöndunum. Af Norðurlöndunum var  hún hæst í Noregi (1,9). Á Bretlandseyjum var fæðingartíðni svipuð og á Norðurlöndunum árið 2006, eða 1,84 í Bretlandi og 1,93 á Írlandi. Lægst var fæðingartíðnin innan álfunnar í löndum Austur-Evrópu árið 2006. Þar var hún á bilinu 1,24 til 1,55, lægst í Slóvakíu en hæst í Eistlandi.

Á sama tíma og frjósemi hefur lækkað hefur meðalaldur mæðra hækkað og konur eignast sitt fyrsta barn síðar en áður var. Frá byrjun sjöunda áratugarins og fram yfir 1980 var meðalaldur frumbyrja 22 ár en eftir miðjan níunda áratuginn og til dagsins í dag hefur meðalaldur frumbyrja hækkað og var 26,6 ár árið 2007.

Barneignaraldur hérlendis lækkaði jafnt og þétt frá aldamótunum 1900 fram undir 1960 en eftir það hefur mæðrum í yngstu aldurshópunum fækkað.  Ef einstakir aldurshópar mæðra eru skoðaðir sést að algengasti barneignaraldurinn nú er  á milli 25 og 29 ára. Á því aldursbili fæddust 128 börn á hverjar 1000 konur árið 2007. Næst algengast er að konur eignist börn á bilinu 30-34 ára. Aldursbundin fæðingartíðni undir tvítugu er nú afar lág og hið sama má segja um fæðingartíðni meðal kvenna yfir fertugu.  Ef þessar tölur eru bornar saman við barneignaraldur á tuttugustu öldinni sést að fæðingartíðni var mun lægri í aldurshópunum undir 25 ára á fyrri hluta aldarinnar en var á síðari hluta aldarinnar. Algengasti barneignaraldurinn á fyrri hluta 20. aldar var þannig aldurshópurinn frá 25-29 ára og aldurshópurinn 30-34 ára fylgdi fast í kjölfarið, líkt og er í dag.  Á síðari helming tuttugustu aldar var algengast að mæður eignuðust börn á aldursbilinu 20-24 ára og næst algengast í aldurshópnum 25-29 ára.

Rétt rúmur þriðjungur þeirra barna sem fæddust árið 2007 (36,2%) voru fædd innan hjónabands, sem er lágt hlutfall ef miðað er við önnur Evrópulönd. Hlutfall þeirra barna sem áttu foreldra í óvígðri sambúð var 49,3%. Hlutfall þeirra barna sem áttu foreldra sem ekki voru skráð í sambúð var 14,4% árið 2007, sem er svipað hlutfall og árið áður.