Heildartekjur einstaklinga á Íslandi voru um 7,7 milljónir króna að meðaltali árið 2021 eða um 640 þúsund krónur á mánuði. Það er rúm 8% hækkun frá fyrra ári en ef horft er til verðlagsleiðréttra heildartekna er hækkunin tæp 4%. Miðgildi heildartekna var lægra en meðaltalið, eða um sex milljónir króna á ári, sem sýnir að helmingur einstaklinga var með heildartekjur undir 500 þúsund krónum á mánuði og helmingur yfir.
Við samanburð á heildartekjum eftir aldurshópum sést að heildartekjur voru að meðaltali hæstar í aldurshópunum 45-49 ára, 50-54 ára og 55-59 ára eða rúmlega tíu milljónir króna árið 2021. Á sama tíma voru meðalheildartekjur einstaklinga á aldrinum 25-64 ára 8,8 milljónir króna og hjá 67 ára og eldri rúmar sjö milljónir króna. Heildartekjur voru lægstar í yngstu aldurshópunum sem má meðal annars skýra af minni atvinnuþátttöku vegna náms. Í aldurshópnum 16-19 ára var meðaltal heildartekna tæplega 1,6 milljónir króna árið 2021 og í því samhengi er rétt að benda á að hér er um að ræða einstaklingstekjur og að margir í þessum aldurshópi búa enn í foreldrahúsum.
Heildartekjur samanstanda af atvinnu-, fjármagns- og öðrum tekjum. Atvinnutekjur eru í flestum aldurshópum stærsti hluti heildartekna einstaklinga en hlutfall þeirra lækkar eftir því sem ofar dregur í aldri. Til að mynda var hlutfall atvinnutekna af heild 78,5% í aldurshópnum 25 - 64 ára árið 2021 á meðan þær voru tæp 14% í aldurshópnum 67 ára og eldri. Hlutfall annara tekna af heildartekjum í aldurshópnum 67 ára og eldri var rúmlega 70% en til annarra tekna teljast m.a. lífeyrisgreiðslur, greiðslur frá Tryggingastofnun og aðrar bótagreiðslur. Sé rýnt í fjármagnstekjur þá voru þær hæstar hjá aldurshópnum 55-59 ára og 60-64 ára eða rúmlega tvöfalt meira en meðtal allra einstaklinga.
Árið 2021 skiptust heildartekjur allra einstaklinga þannig að atvinnutekjur voru 68,2% af heildartekjum, fjármagnstekjur 9,2% og aðrar tekjur 22,6%. Hlutfall atvinnutekna var nánast það sama og árið 2020 og hafði þá ekki farið undir 70% síðan árið 2010. Hlutfall fjármagnstekna af heildartekjum hefur hins vegar hækkað á milli ára og er nú svipað og árið 2017. Hlutfall annarra tekna árið 2021 lækkaði frá fyrra ári sem skýrist að hluta til af því að tekjur vegna atvinnuleysisbóta drógust saman. Árið 2020 hafði hins vegar summa tekna vegna atvinnuleysisbóta aukist verulega á milli ára, meðal annars vegna áhrifa kórónuveirufaraldursins. Summa tekna vegna atvinnuleysisbóta var þó eftir sem áður sögulega há árið 2021.
Um tekjutölfræði úr skattframtölum
Hagstofan hefur uppfært ítarlegt talnaefni um tekjur einstaklinga fyrir tímabilið 1990 til 2021 skipt eftir sveitarfélögum, aldri og kyni. Talnaefnið inniheldur upplýsingar um heildar-, atvinnu-, fjármagns- og ráðstöfunartekjur ásamt öðrum tekjum og sköttum þar sem sýnd eru meðaltöl, miðgildi, deifingar og fjöldi. Talnaefni um tekjur eftir menntun árið 2021 verður uppfært síðar.
Talnaefnið byggir á skattframtölum einstaklinga, 16 ára og eldri, sem skattskyldir eru hér á landi og skilað hafa framtali til ríkisskattstjóra. Undanskildir eru þeir sem eru með handreiknað framtal, með áætlaðar tekjur, létust á árinu eða eru búsettir erlendis samkvæmt þjóðskrá. Gögnin eru samanburðarhæf á milli ára þar sem beitt er samræmdum aðferðum frá ári til árs en vakin er athygli á því að forskráning gagna í skattframtöl hefur aukið upplýsingagæði hin síðari ár og getur það haft áhrif á samanburð.