Velta jókst í flestum af helstu atvinnugreinum landsins í nóvember og desember 2025 samanborið við sömu mánuði árið 2024. Heilt yfir var þó misjafn gangur í hagkerfinu þar sem vöxturinn var oftar en ekki undir breytingu verðlags á tímabilinu en vísitala neysluverðs hækkaði um 4,1% á milli ára. Mest jókst velta í upplýsingatækni þar sem umtalsverður vöxtur átti sér stað í starfsemi tengdri gagnaverum. Þá var einnig mikill vöxtur í bílasölu. Aftur á móti dróst velta töluvert saman í málmframleiðslu auk þess sem markverð lækkun var á veltu í ferðaþjónustu.
Velta í tækni- og hugverkaiðnaði (án lyfjaframleiðslu) var tæplega 154 milljarðar króna í nóvember og desember sem var um 34% meira en á sama tíma árið 2024. Verulegur vöxtur var í upplýsingatæknigreinum og jókst velta hlutfallslega mest starfsemi á sviði upplýsingaþjónustu (gagnavinnslu, hýsingu, o.fl.) eða um rúmlega 131%. Þá var einnig rúmlega 76% aukning á veltu í þjónustustarfsemi á sviði upplýsingatækni en báðar þessar greinar tengjast starfsemi gagnavera. Litlar breytingar voru hins vegar í annarri meðal- og hátækniframleiðslu (2%) auk þess sem samdráttur var í hugbúnaðargerð um rúmlega 12%.
Í einkennandi greinum ferðaþjónustu dróst velta saman um tæplega 7%. Þar var samdráttur í nær öllum geirum greinarinnar að undanskildum heilsulindum þar sem velta jókst um 56%. Alls minnkaði velta í flugi um tæplega 16% og ríflega 11% hjá ferðaskrifstofum (þar af um tæplega 25% í þjónustu tengdum ferðum erlendis og 7% í þjónustu tengdum ferðum innanlands). Um 7% samdráttur var í rekstri gististaða enda fækkaði gistinóttum nokkuð á tímabilinu. Þá var tæplega 2% samdráttur í veitingasölu og -þjónustu, 1% samdráttur í farþegaflutningum á landi en 7% aukning í farþegaflutningum á sjó, vötnum og ám.
Velta í heild- og smásöluverslun var nokkurn veginn í takt við þróun verðlags. Í heildverslun jókst velta um tæplega 5% þar sem um 9% samdráttur var í heildverslun með eldsneyti en um 20% vöxtur í heildverslun með timbur, byggingarvörur og ýmsa járnvöru. Í smásöluverslun jókst velta um rúmlega 4% en þar var rúmlega 8% vöxtur hjá stórmörkuðum og matvöruverslunum auk þess sem velta í lyfjaverslun hélt áfram að aukast eða um tæplega 23%. Samdráttur var hins vegar hjá byggingarvöruverslunum (-3%) og sérverslunum með fatnað og skó (-5%). Mikil veltuaukning var í sölu, viðgerðum og viðhaldi á vélknúnum ökutækjum eða 42% þar sem rúmlega 57% vöxtur var í bílasölu.
Velta í fasteignastarfsemi var nær óbreytt á tímabilinu og jókst um 1% sem að mestu mátti rekja til leigutekna af atvinnuhúsnæði. Í byggingarstarfsemi og mannvirkjagerð var aftur á móti meiri vöxtur eða rúmlega 11% og var veltan þar um 135 milljarðar króna. Þar af jókst velta í sérhæfðri byggingarstarfsemi um 12% og um tæp 8% í byggingu húsnæðis og þróun byggingarverkefna. Þá var einnig 45% vöxtur í mannvirkjagerð en sú grein er jafnan lítil í samanburði við hinar tvær.
Dræmur gangur var í öðrum megin útflutningsgreinum í nóvember og desember. Velta í framleiðslu málma dróst saman um 19% en þrátt fyrir hækkun álverðs hafði minnkun útflutnings um 22% á tímabilinu og styrking krónunnar yfirgnæfandi áhrif á niðurstöðuna. Í sjávarútvegi og fiskeldi var samanlögð velta nær óbreytt en tæplega 3% aukning var á veltu í sjávarútvegi og 12% minnkun í fiskeldi.
Árstölur fyrir 2025
Samhliða birtingu á gögnum fyrir tímabilið nóvember til desember 2025 hafa veftöflur fyrir veltu eftir atvinnugreinum/-flokkum, árum og vsk-þrepum verið uppfærðar með heildartölum fyrir árið 2025. Meðal helstu niðurstaða má þar nefna rúmlega 1% vöxt í einkennandi greinum ferðaþjónustu á milli ára, 10% vöxt í tækni- og hugverkaiðnaði (án lyfjaframleiðslu), 4% vöxt í byggingarstarfsemi, 2% í sjávarútvegi og fiskeldi, 28% í bílasölu, 6% í smásöluverslun, 6% í fasteignastarfsemi og 3% í heildverslun.
Um gögnin
Tölur um veltu skv. virðisaukaskattsskýrslum eru bráðabirgðatölur. Allar tölur eru á nafnvirði nema annað sé tekið fram. Verðbólga fyrir tímabilið nóvember-desember 2024 til nóvember-desember 2025 var 4,1% miðað við meðalgengi vísitölu neysluverðs.
Rannsókn stendur yfir á grunngögnum um framleiðslu á lyfjum og efnum til lyfjagerðar. Að svo stöddu er því ekki unnt að birta tölur fyrir þá atvinnugrein. Þar að auki verða tölur fyrir tækni- og hugverkaiðnað, meðal- og hátækniframleiðslu og heildarveltu (alls og alls án landbúnaðar og skógræktar) birtar án veltu í lyfjaframleiðslu á meðan frekari skoðun á gögnunum fer fram. Þetta gildir um öll gögn frá núverandi tímabili aftur til ársins 2008.
Tölur í landbúnaði fyrir fyrri hluta árs eru að jafnaði taldar með veltu í maí-júní og seinni hluta árs með veltu í nóvember-desember. Ekki eru birtar tölur fyrir nóvember-desember 2025 og árið 2025 í heild sinni fyrir landbúnaðargreinarnar „Ræktun nytjajurta og búfjárrækt, veiðar og tengd þjónustustarfsemi“ og „Skógrækt og skógarhögg“ þar sem tölur fyrir seinni helming árs 2025 liggja ekki fyrir. Þar af leiðandi er ekki birt tala í flokknum „Alls“ enda gæfi það villandi mynd af heildarveltu. Aftur á móti eru birtar tölur í flokknum „Alls, án landbúnaðar og skógræktar“.
Við birtingu síðustu fréttar í desember sl. var velta í virðisaukaskattskyldri starfsemi (án landbúnaðar og lyfjaframleiðslu) talin hafa verið 1.314,1 milljarðar króna (4,7% hækkun miðað við fyrra ár) á tímabilinu september-október 2025. Nú hafa nýrri tölur borist og er velta á þessu tímabili talin hafa verið 1.320,4 milljarðar króna (5,1% hækkun miðað við fyrra ár).