Nýskráningum einkahlutafélaga síðustu 12 mánuði, frá febrúar 2015 til janúar 2016, hefur fjölgað um 15% í samanburði við 12 mánuði þar á undan. Alls voru 2.387 ný einkahlutafélög skráð á tímabilinu, borið saman við 2.069 á fyrri 12 mánuðum. Hlutfallsleg fjölgun nýskráninga var mest í fasteignaviðskiptum þar sem þeim fjölgar úr 219 í 368, eða um 68% á síðustu 12 mánuðum. Meðal annarra greina þar sem nýskráningum hefur fjölgað má nefna byggingarstarfsemi og mannvirkjagerð þar sem nýskráningum fjölgaði úr 228 í 298 (31%) og rekstur gististaða og veitingarekstur þar sem fjölgunin var úr 132 í 162 nýskráningar (23%). Mest hlutfallsleg fækkun nýskráninga síðustu 12 mánuði var í upplýsingum og fjarskiptum, eða um 7% borið saman við fyrra tímabil (úr 184 nýskráningum í 171).

Gjaldþrotum einkahlutafélaga síðustu 12 mánuði, frá febrúar 2015 til janúar 2016, hefur fækkað um 31% í samanburði við 12 mánuði þar á undan. Alls voru 563 fyrirtæki tekin til gjaldþrotaskipta á tímabilinu, borið saman við 816 á fyrra tímabili. Hlutfallslega fækkaði gjaldþrotum mest í flutningum og geymslu, úr 31 í 16 (48%). Einnig má nefna fækkun gjaldþrota í framleiðslu úr 59 í 33 (44%), auk þess að í fjármála- og vátryggingastarfsemi fækkaði gjaldþrotum úr 58 í 33, eða um 43%. Gjaldþrotum fækkaði í öllum helstu atvinnugreinabálkum frá fyrri 12 mánuðum. Hlutfallslega fækkaði þeim hægast í  landbúnaði, skógrækt og fiskveiðum, eða um 9% milli ára (úr 23 gjaldþrotum í 21).

Talnaefni