Á 12 mánaða tímabili, frá nóvember 2015 til október 2016, voru að jafnaði 16.559 launagreiðendur á Íslandi og hafði þeim fjölgað um 663 (4,2%) frá síðustu 12 mánuðum á undan. Frá nóvember 2015 til október 2016 greiddu launagreiðendur að meðaltali um 178.500 einstaklingum laun sem er aukning um 8.100 (4,7%) samanborið við 12 mánaða tímabil ári fyrr.
Launagreiðendur með færri en 10 launþega á sínum vegum voru tæplega 14 þúsund í október síðastliðnum. Til samanburðar voru launagreiðendur með 10 eða fleiri launþega ríflega 2.600.
| Tafla 1: Fjöldi launagreiðenda og launþega í október 2016 | |||
| Launagreiðendur | |||
| Fjöldi | % | Launþegar | |
| Alls¹ | 16.492 | 100,0 | 179.100 |
| <5 launþegar | 11.992 | 73,0 | 19.300 |
| 5-9 launþegar | 1.944 | 12,0 | 12.600 |
| 10-49 launþegar | 1.984 | 12,0 | 40.000 |
| 50-100 launþegar | 286 | 2,0 | 19.500 |
| >100 launþegar | 299 | 2,0 | 99.600 |
| ¹ Þar sem sumir launþegar vinna hjá fleiri en einum atvinnurekenda er heildarfjöldi launþega minni en summan af fjölda launþega í einstökum flokkum | |||
Skipt eftir atvinnugreinum hefur launþegum fjölgað mikið á milli ára hjá launagreiðendum í ferðaþjónustu og byggingariðnaði. Launþegum hefur hins vegar fækkað í greinum tengdum sjávarútvegi.
Í október voru 1.583 launagreiðendur og um 24.600 launþegar í einkennandi greinum ferðaþjónustu og hafði þeim fjölgað um 3.900 eða um 19% samanborið við október 2015. Launþegum í byggingarstarfsemi hefur á sama tíma fjölgað um 1.600 eða um 17%. Hafa verður í huga að í þessum tölum eru ekki upplýsingar um einyrkja sem eru með rekstur á eigin kennitölu og greiða sjálfum sér laun, en slíkt rekstrarform er algengt í byggingariðnaði, landbúnaði, hugverkaiðnaði og skapandi greinum svo dæmi séu tekin.
| Tafla 2: Fjöldi laungagreiðenda og launþega í nokkrum atvinnugreinum | |||||
| Fjöldi | |||||
| launagreiðenda | Fjöldi launþega október | ||||
| okt. 2016 | 2015 | 2016 | Breyting | % | |
| Alls | 16.492 | 170.200 | 179.100 | 8.900 | 5,0 |
| Viðskiptahagkerfið | 12.878 | 115.700 | 124.000 | 8.300 | 7,0 |
| Sjávarútvegur | 508 | 9.600 | 9.000 | -600 | -6,0 |
| Framleiðsla án fiskvinnslu | 1.020 | 16.700 | 17.100 | 500 | 3,0 |
| Byggingarstarfsemi og mannvirkjagerð | 2.408 | 9.200 | 10.800 | 1.600 | 17,0 |
| Heild- og smásöluverslun, viðgerðir á vélknúnum ökutækjum | 2.277 | 24.900 | 26.000 | 1.100 | 4,0 |
| Fjármála- og vátryggingastarfsemi | 381 | 6.200 | 6.200 | 0 | 0,0 |
| Fræðslustarfsemi og opinber stjórnsýsla | 554 | 39.100 | 39.200 | 100 | 0,0 |
| Heilbrigðis- og umönnunarþjónusta | 1.059 | 15.100 | 15.900 | 800 | 5,0 |
| Einkennandi greinar ferðaþjónustu | 1.583 | 20.800 | 24.600 | 3.900 | 19,0 |
| Tækni- og hugverkaiðnaður | 868 | 12.200 | 12.400 | 100 | 1,0 |
| Skapandi greinar | 1.500 | 9.000 | 9.200 | 200 | 2,0 |
Endurskoðun hagtalna
Tölurnar sem hér um ræðir eru bráðabirgðatölur. Þar sem byggt er á staðgreiðslugögnum getur verið vanmat í nýjustu tölum þegar launagreiðendur skila ekki inn upplýsingum tímalega. Meðal annarra skekkjuvalda má nefna orlofsgreiðslur til fyrrverandi starfsmanna. Þegar nýjar tölur eru birtar verða jafnframt birtar endurskoðaðar tölur fyrir fyrri tímabil. Nánari lýsingu á skekkjuvöldum, áhrifum þeirra og og endurskoðun birtra talna má finna í lýsigögnum.
Áður birtar tölur hafa verið endurskoðaðar, þ.e. tekið tillit til nýrra upplýsinga um launagreiðslur og nýjustu upplýsinga um atvinnugreinaflokkun.
Heildarfjöldi launagreiðenda í september 2016 telst nú vera 16.820 og heildarfjöldi launþega 182.500. Fjöldi launþega jókst um 7.600 (4%) frá september 2015 til september 2016.
Í fréttatilkynningu í nóvember 2016 töldust vera 16.347 launagreiðendur og 181.200 launþegar í september 2016. Fjöldi launþega var þá talinn hafa aukist um 6.300 (4%) frá september 2015 til september 2016.
Aðrar hagtölur
Hagstofa Íslands gefur árlega út rekstrar- og efnahagsyfirlit fyrirtækja eftir atvinnugreinum sem byggja á skattframtölum og gefa ítarlega mynd af stöðu einstakra atvinnugreina.