Tekjur af erlendum ferðamönnum á 2. ársfjórðungi námu 119 milljörðum króna og lækkuðu þær um tæpa 9 milljarða, eða um 7%, samanborið við sama ársfjórðung árið áður. Lækkunina má eingöngu rekja til flugreksturs þar sem tekjur drógust saman um 20%, samanborið við 2. ársfjórðung 2018. Að öðru leyti var önnur neysla erlendra ferðamanna á sama tímabili svo til óbreytt.

Flughreyfingum á Keflavíkurflugvelli fækkaði um 11% í september 2019, samanborið við sama mánuð í fyrra. Farþegahreyfingum fækkaði umtalsvert á sama tímabili, úr 982 þúsund í september 2018 í 646 þúsund í september í ár, og munar þar mest um fækkun skiptifarþega, en þeim fækkaði um 57%. Á sama tímabili fækkaði komufarþegum um 17% og brottfararfarþegum um 18%. Séu síðustu 12 mánuðir bornir saman við sama tímabil árið áður, hefur komu- og brottfararfarþegum fækkað um 8%.

Fjöldi launþega í einkennandi greinum ferðaþjónustu dróst saman um 8% í ágúst samanborið við sama mánuð síðasta árs. Mest var fækkun launþega í farþegaflutningum með flugi þar sem fjöldi launþega dróst saman um 20% og lækkaði úr 5.900 í ágúst 2018 í 4.700 í ágúst síðastliðnum. Einnig fækkaði launþegum í veitingasölu- og þjónustu um 8% á sama tímabili, úr 11.000 í 10.100 launþega.

Í þessari útgáfu skammtímahagvísa ferðaþjónustu eru birtar uppfærðar tölur um gistinætur, tekjur af erlendum ferðamönnum og launþegum í einkennandi greinum ferðaþjónustu. Auk þess eru birtar uppfærðar tölur um bílaleigubíla frá Samgöngustofu, umferðatölur frá Vegagerðinni,talningu farþega til landsins samkvæmt talningu Ferðamálastofu auk talna um farþega- og flughreyfingar frá ISAVIA. Ekki eru birtar tölur um áætlaðan ferðamannafjölda í gegnum Keflavíkurflugvöll að þessu sinni þar sem verið er að endurskoða aðferðafræði tengda ferðamannafjölda.

Tafla á PDF

1 Aðrar tegundir skráðra gististaða eru tjaldsvæði, farfuglaheimili, orlofshús, skálar í óbyggðum, íbúðagisting, svefnpokagististaðir og heimagististaðir
2 Ferðaskrifstofur og skipuleggjendur (erlendis): Þjónusta sem veitt er í sambandi við ferðalög erlendis, þ.e. er undanþegin virðisaukaskatti skv. 12. grein laga um virðisaukaskatt (nr. 50/1988). Ferðaskrifstofur og skipuleggjendur (á Íslandi): Þjónusta sem veitt er í sambandi við ferðalög á Íslandi, þ.e. er ekki undanþegin virðisaukaskatti skv. 12. grein laga um virðisaukaskatt (nr. 50/1988).
3 Tölur námundaðar að næsta hundraði
4 Skv. gögnum frá Samgöngustofu
5 Skv. talningu frá Vegagerðinni í gegnum 14 lykilteljara á hringveginum. Mánaðartölur sýna meðalfjölda talninga á dag í hverjum mánuði. Árstímabil sýnir heildartalningar yfir árið
6 Skv. talningu frá Ferðamálastofu
7 Verið er að endurskoða aðferðafræði við útreikning á ferðamönnum til landsins
8 Farþegahreyfingar telja brottfarir, komur og skiptifarþega sem eru tvítaldir

Talnaefni
Hagvísar í ferðaþjónustu
Þjónustujöfnuður
Tekjur af erlendum ferðamönnum

• Deildu fréttinni á Facebook
• Deildu fréttinni á Twitter
• Sendu fréttina með póst