Samkvæmt tilraunatölfræði gistinátta er áætlað að gistinætur á hótelum í júní hafi dregist saman um 79% og fækkað úr 420 þúsund í 90 þúsund samanborið við júní í fyrra.

Í maí fækkaði skráðum gistinóttum um 87%, úr 570 þúsund í tæplega 76 þúsund, samanborið við maí í fyrra. Þar af drógust gistinætur á hótelum saman um 88%, úr 315 þúsund í 37 þúsund. Nýting hótelherbergja lækkaði um 47 prósentustig, úr 56% í maí í fyrra niður í 9% síðastliðinn maí. Framboð hótelherbergja dróst einnig saman í kjölfar þess að 47 hótel höfðu lokað í maí. Framboð herbergja lækkaði því um 26%, úr tæplega 11 þúsund herbergjum niður í tæplega 8 þúsund.

Í júní fækkaði brottfararfarþegum um 95,7% samanborið við sama mánuð í fyrra, úr 259 þúsund í rúmlega 11 þúsund. Séu síðustu 12 mánuðir bornir saman við sama tímabil árið áður hefur farþegum fækkað úr rúmlega 2,9 milljónum í rúmlega 1,8 milljónir, eða um 35%.

Bílaleigubílar í umferð voru 15.600 talsins í júlí og fækkaði þeim um 37% samanborið við sama mánuð síðasta árs. Séu síðustu 12 mánuðir bornir saman við sama tímabil í fyrra hefur heildarfjöldi bílaleigubíla dregist saman úr 25 þúsund í 23 þúsund, eða 8%, á meðan fjöldi bílaleigubíla í umferð hefur dregist saman um 15%, úr 23.500 í 20.000.

Í þessari útgáfu skammtímahagvísa ferðaþjónustu eru birtar uppfærðar tölur um gistinætur. Auk þess eru birtar uppfærðar tölur um bílaleigubíla frá Samgöngustofu, umferðatölur frá Vegagerðinni, talningu farþega til landsins samkvæmt talningu Ferðamálastofu og tölur um farþega- og flughreyfingar frá ISAVIA.

Taflan á pdf

¹ Aðrar tegundir skráðra gististaða eru tjaldsvæði, farfuglaheimili, orlofshús, skálar í óbyggðum, íbúðagisting, svefnpokagististaðir og heimagististaðir.
² Ferðaskrifstofur og skipuleggjendur (erlendis): Þjónusta sem veitt er í sambandi við ferðalög erlendis, þ.e. er undanþegin virðisaukaskatti skv. 12. grein laga um virðisaukaskatt (nr. 50/1988). Ferðaskrifstofur og skipuleggjendur (á Íslandi): Þjónusta sem veitt er í sambandi við ferðalög á Íslandi, þ.e. er ekki undanþegin virðisaukaskatti skv. 12. grein laga um virðisaukaskatt (nr. 50/1988).
³ Tölur námundaðar að næsta hundraði.
⁴ Skv. gögnum frá Samgöngustofu.
⁵ Skv. talningu frá Vegagerðinni í gegnum 14 lykilteljara á hringveginum. Mánaðartölur sýna meðalfjölda talninga á dag í hverjum mánuði. Árstímabil sýnir heildartalningar yfir árið.
⁶ Skv. talningu frá Ferðamálastofu.
⁷ Farþegahreyfingar telja brottfarir, komur og skiptifarþega sem eru tvítaldir.
⁸ Tölur ekki reiknaðar fyrir apríl vegna ófullnægjandi gagna.

Talnaefni
Hagvísar í ferðaþjónustu
Tilraunatölfræði um gistinætur
Þjónustujöfnuður
Tekjur af erlendum ferðamönnum

Nánari upplýsingar

Deila