Gistinætur á hótelum í mars síðastliðnum voru 375.900, sem er 5% aukning frá sama mánuði árið áður. Um 64% allra gistinátta voru á höfuðborgarsvæðinu eða 240.900.

Um 88% gistinátta voru skráðar á erlenda ferðamenn, en erlendum gistinóttum fjölgaði um 6% frá mars í fyrra á meðan gistinóttum Íslendinga fækkaði um 3%. Bandaríkjamenn gistu flestar nætur (99.000), síðan Bretar (86.200) og Þjóðverjar (21.800), en gistinætur Íslendinga voru 43.900.

Á tólf mánaða tímabili, frá apríl 2017 til mars 2018, var heildarfjöldi gistinátta á hótelum um 4.299.800 sem er 6% aukning miðað við sama tímabil árið áður.

70% nýting herbergja á hótelum í mars
Herbergjanýting í mars 2018 var 70,1%, sem er lækkun um 4,3 prósentustig frá mars 2017 þegar hún var 74,4%. Á sama tíma hefur framboð gistirýmis aukist um 8,3% mælt í fjölda herbergja. Nýtingin í mars var best á höfuðborgarsvæðinu, eða 84,7%.

Áætlun á heildarfjölda gistinátta fyrir allar tegundir gististaða í mars
Hagstofan áætlar að heildarfjöldi gistinátta á öllum tegundum skráðra gististaða hafi í mars verið um 606.600. Af þeim gistinóttum, sem eru áætlaðar af gististöðum skráðum í gistináttagrunn Hagstofunnar, má ætla að gistinætur erlendra gesta hafi verið um 540.800 og gistinætur Íslendinga um 65.800.

Auk hótela og gistiheimila er um að ræða s.s. farfuglaheimili, orlofshús, svefnpokagististaði, íbúða- og heimagistingu auk tjaldsvæða og skála í óbyggðum. Auk þess áætlar Hagstofan að fjöldi gistinátta í gegnum vefsíður á borð við AirBnB í mars hafi verið 107.000

Tölur fyrir 2017 og 2018 eru bráðabirgðatölur. Um þessar mundir fer fram vinna við endurskoðun á skiptingu gistinátta eftir þjóðerni ferðamanna. Þessi vinna hefur ekki áhrif á heildarfjölda gistinátta en gæti haft áhrif á hlutfall milli erlendra og innlendra ferðamanna.

Talnaefni