Gistinætur á hótelum í apríl voru 292.100 sem er 25% aukning miðað við apríl 2016. Gistinætur erlendra gesta voru 84% af heildarfjölda gistinátta í mánuðinum en þeim fjölgaði um 26% frá sama tíma í fyrra á meðan gistinóttum Íslendinga fjölgaði um 21%.

Flestar gistinætur á hótelum í apríl voru á höfuðborgarsvæðinu eða 181.900 sem er 16% aukning miðað við apríl 2016. Um 62% allra gistinátta voru á höfuðborgarsvæðinu. Næstflestar voru gistinætur á Suðurlandi eða um 54.700. Erlendir gestir með flestar gistinætur í apríl voru Bandaríkjamenn með 61.900, Bretar með 54.500 gistinætur og Þjóðverjar með 22.100, en íslenskar gistinætur í apríl voru 45.500.

Á tólf mánaða tímabili frá maí 2016 til apríl 2017 var heildarfjöldi gistinátta á hótelum 4.122.000 sem er 32% aukning miðað við sama tímabil árið áður.

66,1% nýting herbergja á hótelum í apríl 2017
Herbergjanýting í apríl 2017 var 66,1%, sem er aukning um 6,9 prósentustig frá apríl 2016, þegar hún var 59,2%. Nýtingin var best á höfuðborgarsvæðinu, eða um 79,7%.

Athygli skal vakin á því að hér er eingöngu átt við gistinætur á hótelum sem opin eru allt árið. Til þessa flokks gististaða teljast hvorki gistiheimili né hótel sem eingöngu eru opin yfir sumartímann. Tölur fyrir 2017 eru bráðabirgðatölur.

Samfara birtingu á gistinóttum á hótelum í apríl 2017 er tafla með upplýsingum um gistinætur á öllum gististöðum niður á sveitarfélög fyrir árin 2008-2016 nú tilbúin og er aðgengileg í talnaefni á vef Hagstofunnar. Enn er unnið að því að uppfæra tölur fyrir fyrri ár til samræmis við það að sveitarfélagið Höfn í Hornafirði telst nú með Suðurlandi, í stað Austurlands áður.

Talnaefni