Gistinóttum fækkar um tæp 9%
Gistinætur á hótelum í ágúst síðastliðnum voru 187.700 en voru 205.200 í sama mánuði árið 2009.
Fækkun gistinátta í ágúst nær til allra landsvæða en hlutfallslega fækkaði gistinóttum mest á Norðurlandi og Austurlandi eða um rúm 18%. Gistinóttum á Norðurlandi fækkaði úr 24.000 í 19.600 og á Austurlandi voru 10.300 gistinætur samanborið við 12.600 í ágúst 2009. Á Suðurlandi fækkaði gistinóttum úr 30.300 í ágúst 2009 í 26.700 eða um 12 %. Á höfuðborgarsvæðinu voru 113.400 gistinætur í ágúst sem er 6% minna en í fyrra, á Suðurnesjum fækkaði gistinóttum um 4% og á Vesturlandi og Vestfjörðum um tæp 2% samanborið við ágúst 2009.
Fækkun gistinátta á hótelum í ágúst nær bæði til erlendra gesta og Íslendinga. Gistinóttum erlendra gesta á hótelum fækkaði um 10% samanborið við ágúst 2009 og gistinóttum Íslendingar fækkar um 1%.
Gistinóttum á hótelum fyrstu átta mánuði ársins fækkar um 3% milli ára
Gistinætur fyrstu átta mánuði ársins voru 951.800 en voru 978.900 á sama tímabili árið 2009. Gistinóttum fjölgaði á Vesturlandi og Vestfjörðum um 2% en á Suðurnesjum og Suðurlandi voru gistinætur svipaðar á milli ára. Á Norðurlandi og Austurlandi fækkaði gistinóttum um 5% á milli ára og gistinætur á höfuðborgarsvæðinu voru 3% færri í ár samanborið við fyrstu átta mánuði ársins 2009. Fyrstu átta mánuði ársins fækkar gistinóttum Íslendinga um 8% frá fyrra ári á meðan gistinóttum útlendinga fækkar um 2%.
Athygli skal vakin á því að hér er eingöngu átt við gistinætur á hótelum, þ.e. hótelum sem opin eru allt árið. Til þessa flokks gististaða teljast hvorki gistiheimili né hótel sem eingöngu eru opin yfir sumartímann.