Gistinóttum á hótelum fækkaði um 2,3% í október 2025 samkvæmt bráðabirgðatölum Hagstofu Íslands um ferðaþjónustu á Íslandi. Alls voru gistinæturnar tæplega 505.000 á landsvísu en til samanburðar voru þær tæplega 517.000 á sama tíma árið 2024. Gistinóttum fækkaði mest á höfuðborgarsvæðinu eða um 4,0% en þá var einnig umtalsverð fækkun á Suðurnesjum (-2,9%) og Vesturlandi og Vestfjörðum (-2,9%). Á Norðurlandi fækkaði gistinóttum um 1,0% en lítils háttar aukning var á Suðurlandi (0,7%) og Austurlandi (0,1%). Alls fækkaði gistinóttum á höfuðborgarsvæðinu um rúmlega 10 þúsund en samanlagt um 1.500 í öðrum landshlutum, þar af um rúmlega eitt þúsund á Suðurnesjum.
Gistinætur erlendra ferðamanna voru um 451.000, eða 89% af gistinóttum hótela, og var það 3,5% aukning frá fyrra ári. Gistinætur Íslendinga á hótelum voru 54.000 sem var 33,4% minna en í október árið 2024. Meginþorri erlendra ferðamanna var af Bandarísku bergi brotinn en gistinóttum þeirra fækkaði um 11,3%. Þá fækkaði einnig ferðamönnum frá Bretlandi um 8,5%. Lítils háttar aukning var á gistinóttum Þjóðverja (3,0%) en gistinóttum ferðamanna frá Kína fjölgaði verulega eða um 97,2%. Á fyrstu tíu mánuðum ársins jukust gistinætur erlendra ferðamanna á hótelum um 11,1%. Gistinóttum Íslendinga á hótelum fækkaði hins vegar um 28,1% á sama tíma.
Framboð hótelherbergja jókst um 3,7% á landinu í október. Mest jókst framboð herbergja á Suðurlandi eða um 9,7% en þá var einnig töluverð aukning á Vesturlandi og Vestfjörðum (7,4%). Á Norðurlandi fjölgaði herbergjum um 3,5% en minni aukning var á höfuðborgarsvæðinu (1,2%) og Suðurnesjum (1,0%). Á Austurlandi fækkaði hótelherbergjum um 4,8%. Alls voru 179 hótel starfandi í október 2025 með 12.420 herbergi og var fjöldinn aðeins meiri en á sama tíma árið 2024 þegar alls voru starfandi 175 hótel. Á höfuðborgarsvæðinu voru rekin 58 hótel með alls 5.555 herbergi og 52 á Suðurlandi með 3.102 herbergi.
Herbergjanýting dróst um 4,5 prósentustig á landinu í heild. Mest minnkaði nýtingin á Suðurlandi (6,4 prósentustig) og höfuðborgarsvæðinu (5,5 prósentustig). Einnig var 4,1 prósentustiga minnkun á Vesturlandi og Vestfjörðum og 2,8 prósentustiga minni nýting á Norðurlandi. Á Austurlandi batnaði herbergjanýting um 2,6 prósentustig og á Suðurnesjum var hún nær óbreytt (0,4 prósentustiga aukning). Í október var herbergjanýting mest á höfuðborgarsvæðinu (80,9%) og því næst á Suðurlandi (76,4%).
Allir gististaðir
Þegar allir skráðir gististaðir (hótel, gistiheimili, tjaldsvæði, orlofshús, o.fl.) eru skoðaðir var áætlaður heildarfjöldi gistinátta í október rúmlega 793.000. Þetta var 1,8% aukning miðað við sama tíma árið 2024 en þá var heildarfjöldi gistinátta á öllum gististöðum tæplega 779.000. Meginþorri gistinátta var á hótelum og gistiheimilum eða um 607.000 (505.000 á hótelum og 102.000 á gistiheimilum) en tæplega 186.000 á öðrum tegundum skráðra gististaða (tjaldsvæðum, orlofshúsum, o.s.frv.). Á fyrstu tíu mánuðum ársins voru uppsafnaðar gistinætur alls 9.260.000 sem var 8,4% meira en á sama tíma árið 2024.
Endurskoðun gagna eftir þjóðerni og óskráðar gistinætur
Endurskoðun á flokkun gagna um gistinætur er nú lokið og hafa gögn á vef Hagstofunnar verið uppfærð í samræmi við það. Hafa ber í huga að allar tölur um gistinætur eru bráðabirgðatölur og geta tekið breytingum á milli mánaðarlegra birtinga. Gögn sem fást frá gististöðum geta innihaldið tölur um fjölda gistinátta af óþekktum þjóðernum og er þeim tölum dreift með hlutfallslegum hætti á þekkt þjóðerni hverju sinni.
Lýsigögn
Tölur um gistinætur fyrir skráða gististaði eru fengnar úr gistináttagrunni Hagstofu Íslands. Lýsigögn um fjölda gististaða, gesta og gistinátta má nálgast á vef Hagstofunnar.
Allar tölur fyrir 2025 eru bráðabirgðatölur nema tölur um gistinætur hótela þar sem bráðabirgðatölur eru fyrir október 2025.