Atvinnuleysi 5,2% í júní

Samkvæmt Vinnumarkaðsrannsókn Hagstofu Íslands voru í júní 2012 að jafnaði 192.500 manns á vinnumarkaði. Af þeim voru 182.400 starfandi og 10.100 án vinnu og í atvinnuleit. Atvinnuþátttaka mældist 85,8%, hlutfall starfandi 81,3% og atvinnuleysi var 5,2%. Atvinnuleysi hefur aukist um 0,6 prósentustig frá því í júní 2011 en þá var atvinnuleysi 4,7%.

Á öðrum ársfjórðungi 2012 mældist atvinnuþátttaka 82,8% að jafnaði. Hlutfall starfandi var 76,9% og atvinnuleysi 7,2%. Starfandi fjölgaði um 2.200 manns og atvinnulausum fækkaði um 2.500 frá öðrum ársfjórðungi 2011.

Atvinnulausir teljast þeir sem voru án atvinnu í viðmiðunarviku könnunarinnar, þ.e. höfðu hvorki atvinnu né voru í vinnu (í eina klukkustund eða lengur) sem launþegi eða sjálfstætt starfandi, eru að leita að vinnu og geta hafið störf innan tveggja vikna eða hafa fengið starf sem hefst innan 3 mánaða. Einstaklingar sem eru ekki í vinnu en eru í námi flokkast atvinnulausir ef þeir uppfylla skilyrðin hér að ofan.

Vinnumarkaður júní 2012

Árstíðaleiðrétt atvinnuleysi 6%

Árstíðaleiðréttur fjöldi atvinnulausra í júní 2012 var 11.100 eða 6% en var 9.600 eða 5,4% í maí. Fjöldi starfandi var 171.700 í júní 2012 eða 76,9% en var 170.200 í maí eða 76,6%. Þrátt fyrir að árstíðaleiðrétt atvinnuleysi er hærra nú en á sama tíma fyrir ári sýnir leitni árstíðaleiðréttingar að enn dregur nokkuð úr atvinnuleysi.

Langtímaatvinnuleysi minnkar á milli ára

Þeir sem hafa verið atvinnulausir í 12 mánuði eða lengur eru skilgreindir sem langtímaatvinnulausir. Á öðrum ársfjórðungi 2012 höfðu um 2.800 manns verið atvinnulausir svo lengi eða 21,2% atvinnulausra. Á öðrum ársfjórðungi 2011 voru þeir sem höfðu verið atvinnulausir ár eða lengur um 3.900 manns eða 24,7% atvinnulausra.

Framkvæmd

Júní 2012 nær til fjögurra vikna, frá 4. júní til 1. júlí. Úrtakið í maí var 1.206 manns á aldrinum 16–74 ára sem valdir voru af handahófi úr þjóðskrá. Þegar frá eru taldir þeir sem voru látnir eða búsettir erlendis reyndist nettóúrtakið 1.187 einstaklingur. Alls fengust nothæf svör frá 992 einstaklingum sem jafngildir 83,6% af endanlegri svörun. Allar tölur hafa verið vegnar eftir kyni og aldri. Vikmörk mánaðarlegra niðurstaðna um atvinnuþátttöku eru ±2,2% og atvinnuleysi ±1,5%. Allar fjöldatölur eru afrúnnaðar að næsta hundraði.

Vinnumarkaður á 2. ársfjórðungi - Hagtíðindi

Talnaefni

• Deildu fréttinni á Facebook
• Deildu fréttinni á Twitter
• Sendu fréttina með póst
• Prenta frétt