Vísitala neysluverðs miðuð við verðlag í apríl 2013 er 411,5 stig (maí 1988=100) og hækkaði um 0,19% frá fyrra mánuði. Vísitala neysluverðs án húsnæðis er 392,0 stig og lækkaði um 0,13% frá mars.

Kostnaður vegna eigin húsnæðis jókst um 1,8% (vísitöluáhrif 0,23%). Verð á bensíni og olíum lækkaði um 4,0% (-0,23%) og verð á nýjum bílum lækkaði um 2,2% (-0,12%).

Síðastliðna tólf mánuði hefur vísitala neysluverðs hækkað um 3,3% og vísitalan án húsnæðis um 3,5%. Undanfarna þrjá mánuði hefur vísitala neysluverðs hækkað um 2,0% sem jafngildir 8,4% verðbólgu á ári (8,5% verðbólgu á ári fyrir vísitöluna án húsnæðis).

Vísitala neysluverðs samkvæmt útreikningi í apríl 2013, sem er 411,5 stig, gildir til verðtryggingar í júní 2013. Vísitala fyrir eldri fjárskuldbindingar, sem breytast eftir lánskjaravísitölu, er 8.125 stig fyrir júní 2013.

Vísitalan er nú birt á nýjum grunni, mars 2013, og byggist hann á niðurstöðum úr útgjaldarannsókn Hagstofu Íslands árin 2009–2011. Auk hennar hefur Hagstofan notað ýmsar nýrri heimildir við vinnslu grunnsins, svo sem tölur um nýskráningar bifreiða. Innbyrðis vægi dagvöruverslana hefur verið endurskoðað og eru áhrif þeirrar breytingar 0,01% til hækkunar. Að öðru leyti veldur endurnýjun grunnsins sem slík ekki breytingum á vísitölunni milli mars og apríl. Hlutfallslega skiptingu vísitölunnar á gömlum og nýjum grunni í mars 2013 er að finna hér.