Verðtrygging húsaleigu
Undangengin 15 ár hefur Hagstofa Íslands reiknað og birt á þriggja mánaða fresti svonefnda verðbótahækkun húsaleigu skv. lögum nr. 62/1984. Alþingi samþykkti í desember sl. (lög nr. 168/1998) að lögin nr. 62/1984 skyldu falla úr gildi 1. apríl nk. og reiknaði Hagstofan „verðbótahækkun húsaleigu" í síðasta sinn fyrir tímabilið janúar-mars 1999.
Hagstofan vill vekja athygli á því að ekki er lengur unnt að nota áðurnefnda verðbótahækkun til að verðtryggja húsaleigu. Þess háttar ákvæði skal því ekki taka upp í nýja húsaleigusamninga. Leigusalar og leigutakar sem hafa slík ákvæði í leigusamningum sínum verða nú að semja að nýju um hvað skuli leysa þau af hólmi frá 1. apríl nk.
Í húsaleigulögum nr. 36/1994 er ákvæði um að samningsfrelsi ríki milli manna um húsaleigu og var því við afnám laganna ekki tekin afstaða til þess hvort eða hvaða verðtryggingarákvæði skuli vera í leigusamningum. Kjósi menn að verðtryggja fjárhæðir í samningum mælir Hagstofan að jafnaði ekki sérstaklega með einum verðmælikvarða umfram annan.
Helstu vísitölur til verðtryggingar eru neysluverðsvísitala sem mælir verðbreytingar á einkaneyslu og er meðal annars notuð til verðtryggingar á sparifé og lánsfé og byggingarvísitala sem mælir breytingar á byggingarkostnaði og er aðallega notuð til að verðtryggja verksamninga.