Manntal

Undirbúningur er hafinn að gerð manntals á Íslandi og munu upplýsingar manntalsins miðast við 31. desember 2011. Innsöfnun upplýsinga verður ekki á eyðublöðum eins og fyrr á tíð þegar gengið var í hvert hús á landinu heldur verður manntalið skráartengt og verða gögn Þjóðskrár Íslands meginuppistaða þess auk gagna frá öðrum stofnunum. Með skráartengdu manntali sparast bæði tími og peningar við úrvinnslu gagna.

Manntalið mun gefa upplýsingar um íbúafjölda, menntun, atvinnuþátttöku og stöðu mannfjöldans á vinnumarkaði, sem og um fjölskyldur og heimili. Auk þess verða birtar í fyrsta skipti í 50 ár áreiðanlegar og yfirgripsmiklar tölur um húsnæði landsmanna, fjölda íbúða, sumarhúsa, íbúðarhúsnæði sem stendur autt og annað um húsnæðisaðstæður landsmanna. Nær allar þessar upplýsingar verða birtar fyrir hvert og eitt sveitarfélag en ekki aðeins stærri landsvæði.

Árið 2008 setti Evrópusambandið reglugerð sem skuldbatt aðildarlöndin til að taka manntöl á tíu ára fresti, það fyrsta árið 2010 eða 2011. Reglugerðin var felld inn í EES-samninginn og af þeim sökum er Íslandi skylt að taka þátt í verkefninu. Manntöl gera okkur kleift að bera okkur saman við nágrannaþjóðir og einnig þjóðir í fjarlægum heimsálfum þar sem manntöl eru framkvæmd hjá langflestum þjóðum heims.

Engum viðkvæmum persónuupplýsingum verður safnað í skilningi 8. tl. 2. gr. l. nr. 77/2000 um Persónuvernd og persónugreinanlegar upplýsingar og engar upplýsingar verða birtar sem rekja má til tiltekinna einstaklinga.

Kynningarbæklingur um manntalið 2011

Fyrsta manntal á Íslandi var tekið árið 1703 og er það elsta varðveitta heimildin um heila þjóð. Gerð manntala hefur verið í umsjá Hagstofunnar allt frá stofnun hennar árið 1914. Manntöl voru tekin á tíu ára fresti á árunum 1920 til 1960 en með stofnun þjóðskrár árið 1952 urðu mikil þáttaskil þar sem þjóðskráin geymir grundvallarupplýsingar um íbúa landsins. Hagstofa Íslands og Þjóðskalasafn Íslands gáfu út Ritið Manntalið 1703 þrjú hundruð ára: Greinar í tilefni afmælis árið 2005. Hægt er að panta ritið á vef Hagstofunnar.