Meðalaldur starfsfólks við kennslu í grunnskólum hefur farið hækkandi frá árinu 2000. Haustið 2000 var meðalaldur starfsfólks við kennslu 42,2 ár en var 46,8 ár haustið 2016. Á þessu tímabili hefur meðalaldur kvenkennara hækkað meira eða úr 41,8 árum í 46,9 ár. Meðalaldur karlkennara hefur hækkað úr 43,6 árum í 46,3 ár. Meðalaldur starfsfólks við kennslu án réttinda er töluvert lægri en réttindakennara og hefur svo verið á öllu tímabilinu. Haustið 2016 var meðalaldur kennara með kennsluréttindi 47,3 ár en meðalaldur kennara án kennsluréttinda 38,8 ár.
Myndin hér að neðan sýnir aldursskiptingu starfsfólks við kennslu. Kennurum undir þrítugu fækkar, en kennurum sem eru 50 ára og eldri fjölgaði úr 23,7% haustið 1998 í 41,3% haustið 2016. Á sama tíma fjölgaði kennurum sem eru 60 ára og eldri úr 5,7% í 14,2%.
Kennarar án kennsluréttinda voru 5,6% starfsfólks við kennslu haustið 2016
Á árunum 1998-2008 var hlutfall starfsfólks við kennslu í grunnskólum landsins, sem var án kennsluréttinda, á bilinu 13-20%. Hlutfallið lækkaði eftir hrun um allt land og fór lægst í 4,1% haustið 2012. Síðan 2012 hefur kennurum án kennsluréttinda fjölgað ár frá ári og voru 5,6% haustið 2016. Þá voru 272 starfsmenn við kennslu án kennsluréttinda og hafði fjölgað um 11 frá árinu áður.
Mikil fjölgun starfsfólks við stuðning frá 1998
Haustið 2016 störfuðu 7.907 starfsmenn við grunnskóla á Íslandi, 254 fleiri en haustið 2015 (3,3% fjölgun).
Sé litið aftur til ársins 1998, þegar gagnasöfnun Hagstofu um grunnskólann hófst, hefur ýmsum stuðningsaðilum nemenda fjölgað verulega. Þroskaþjálfum hefur fjölgað hlutfallslega mest, eða um 559%, úr 29 í 191 haustið 2016. Stuðnings- og uppeldisfulltrúum hefur fjölgað um 307%, úr 247 í 1.006. Fjöldi sérkennara og skólasálfræðinga/námsráðgjafa hefur meira en tvöfaldast á þessu sama tímabili. Ef tekið er mið af öllum starfsmönnum grunnskóla hefur starfsmönnum fjölgað um 29,8% frá hausti 1998.
Grunnskólanemendur með erlent móðurmál hafa aldrei verið fleiri
Nemendum sem skráðir voru með erlent tungumál að móðurmáli hefur fjölgað ár frá ári frá því að Hagstofan hóf að safna inn þeim upplýsingum. Haustið 2016 höfðu 4.148 grunnskólanemendur erlent tungumál að móðurmáli, eða 9,3% nemenda, sem er 1,2 prósentustigi meira en árið áður. Einhverjir þessara nemenda hafa einnig íslensku sem móðurmál. Algengasta erlenda móðurmál nemenda var pólska (1.467 nemendur), þá filippseysk mál (331 nemandi), enska (256 nemendur) og taílenska (223 nemendur).
Ef litið er á nokkur tungumál, sem töluð eru af 50 eða fleiri nemendum, má sjá að nemendum sem tala rúmensku fjölgaði um tvo þriðju (66,7%), þeim sem tala arabísku fjölgaði um tæplega 40% (39,7%), nemendum sem tala spænsku fjölgaði um rúm 36% (36,4%), nemendum sem tala ýmis afrísk mál fjölgaði um rúman þriðjung (34,9%) og þeim sem tala þýsku um tæpan þriðjung (31,9%) á milli ára.
Nemendum með erlent ríkisfang fjölgaði um 14,0% á milli ára og voru 2.046 haustið 2016.
Nemendum í grunnskólum fjölgar áfram
Nemendur í grunnskólum á Íslandi voru 44.527 haustið 2016. Nemendum fjölgaði um 767 (1,8%) frá fyrra ári og hafa ekki verið fleiri síðan haustið 2003. Haustið 2016 stunduðu auk þess 82 börn nám í 5 ára bekk, 12 færri en haustið 2015. Nemendum í 5 ára bekk hefur fækkað úr 184 haustið 2012 eða um rúmlega helming á fjórum árum.
Alls störfuðu 170 grunnskólar á landinu skólaárið 2016-2017, sem er fjölgun um tvo skóla frá fyrra ári. Einkaskólarnir voru 13 talsins með 1.109 nemendur og eru nemendur í 5 ára bekk undanskildir. Í sérskólum, sem voru þrír talsins, stunduðu 164 nemendur nám, lítið eitt fleiri en undanfarin ár.