Frétt

þriðjudagur 21. febrúar 2012
Nr. 29/2012

Dánartíðni og ævilengd 2011

Vinsamlegast athugið að þessari fréttatilkynningu var breytt 22. 02. 2013 frá upprunalegri útgáfu.

Árið 2011 létust 1.985 einstaklingar sem búsettir voru á Íslandi, 998 karlar og 987 konur. Dánartíðni var 6,2 látnir á hverja 1.000 íbúa og lækkaði lítillega frá árinu 2010.

Ungbarnadauði á Íslandi var 0,9 börn af hverjum 1.000 lifandi fæddum árið 2011 en var 2,2 börn af hverjum 1.000 lifandi fæddum árið 2010.

Árið 2011 gátu nýfæddir drengir vænst þess að ná að meðaltali 80,1 ára aldri, en stúlkur 83,8 ára aldri. Á fimm ára tímabili, 2006-2010 var meðalævi karla 79,6 ár en kvenna 83,3 ár.

Ungbarnadauði lægstur á Íslandi meðal Evrópuþjóða
Árið 2010 var ungbarnadauði á Íslandi 2,2 af 1.000 lifandi fæddum. Hvergi í Evrópu var ungbarnadauði jafn lágur og hér árið 2010. Næstir Íslandi komu Finnar en þar var ungbarnadauði 2,3 af 1.000 lifandi fæddum. Annars staðar á Norðurlöndum var ungbarnadauði á bilinu 2,5-3,4. Í Evrópu var ungbarnadauði tíðastur í Tyrklandi eða 13,2 af hverjum 1,000 lifandi fæddum árið 2010.

Íslenskir karlar í öðru sæti yfir langlífi í Evrópu
Lífslíkur íslenskra karla hafa batnað mjög á undanförnum árum. Frá árinu 2000 hafa þeir bætt við sig rúmlega tveimur árum í meðalævilengd. Árið 2010 var meðalævilengd íslenskra karla 79,7 ár og skipuðu þeir annað sætið meðal Evrópuþjóða það ár. Í fyrsta sæti voru karlar í Sviss en þar gátu nýfæddir drengir vænst þess að verða 79,9 ára. Styst er meðalævilengd evrópskra karla í Úkraínu (62,0 ár), Rússlandi (62,8 ár) og Hvíta-Rússlandi (64,7 ár).

Íslenskar konur í níunda sæti
Lengi vel voru lífslíkur íslenskra kvenna hæstar í heiminum en þær hafa dregist nokkuð afturúr stallsystrum sínum í Evrópu á þessari öld. Ástæðan fyrir því er hraðari aukning ævilengdar í nokkrum Evrópulöndum. Árið 2010 var meðalævilengd íslenskra kvenna 83,7 ár og skipuðu þær níunda sætið meðal Evrópuþjóða. Elstar evrópskra kvenna verða konur á Spáni (85,3 ár), Frakklandi (85,0 ár) og Sviss (84,6 ár). Meðalævilengd evrópskra kvenna er styst í Moldóvu (73,4 ár) og Úkraínu (74,3 ár).

Skýringar
Um er að ræða bráðabirgðatölur yfir dána fyrir árið 2011. Þær verða endurskoðaðar í byrjun september 2011.

Ungbarnadauði er alþjóðleg stöðluð vísitala á dánartíðni barna á fyrsta aldursári. Hún er reiknuð með því að deila fjölda látinna á fyrsta aldursári með fjölda lifandi fæddra í árgangi og margfalda niðurstöðuna með 1.000.

Við samanburð á tölum um ævilengd í Evrópu er rétt að geta þess að íslensku tölurnar byggja á tveggja ára meðaltali, en aðrar tölur eru byggðar á gögnum hvers árs fyrir sig. Tölur fyrir og Sviss, Bretland, Frakkland, Belgíu, Rúmeníu, Moldóvu, Hvíta-Rússland og Rússland byggja á gögnum frá árinu 2009. Auk þess byggja tölur fyrir Ítalíu, Albaníu, Georgíu og Úkraínu á tölum fyrir 2008 og fyrir Armeníu á gögnum frá 2007.

Talnaefni



Öllum eru heimil afnot af fréttatilkynningunni. Vinsamlegast getið heimildar.

Nánari upplýsingar eru veittar í síma 528 1030, netfang mannfjoldi[hja]hagstofa.is

 

Leita Leit

Byggir á LiSA CMS. Eskill -LiSA, Sharepoint, Veflausnir og Vefumsjónarkerfi